Экономикалық зерттеулер ұлттық бюросының басқарушы серіктесі Қуаныш Бейсенгазин economykz.org сайтына арналған сараптамалық шолуында былай дейді: «Экономикалық өсімнің халықтың нақты табысына “сіңуі” шекті сипатқа ие екені анықталды. Яғни, халықтың ең кедей 10 пайызының табысы тек жылдық жалпы ішкі өнімнің (ЖІӨ) өсімі 3,35%-тен асқан жағдайда ғана тұрақты түрде өсетінін көрсетеді. Ал бұдан төмен көрсеткіштер кезінде макроэкономикалық өсім олардың табысына статистикалық тұрғыда елеулі ықпал етпейді. Сонымен қатар халықтың ең бай 10 пайызының табысы ЖІӨ жылдық өсімі 3,30%-тен асқан сәттен бастап оң серпінмен өзгере бастайды. Мұндай байланыс тіпті экономикалық өсімнің орташа деңгейінде де байқалады. Яғни экономиканың баяу өсуі жағдайында да бай топтың табысы артады. Жалпы табыс деңгейіне қатысты шекті көрсеткіштің 3,3 пайызбен шектелуі – табыс өсімінің басым бөлігінің халықтың кең ауқымына кешігіп таралатынын әрі экономикалық белсенділіктің тиімділігі ең алдымен жоғары табыс топтарына бағытталатынын айқындайды».
Евразия24 пікірі:
Жуырда «Үздік ақпараттық бестік» айдарында біз economykz.org сайтында жарық көрген экономист Айдархан Құсайыновтың пікірін жарияладық. Ол Қазақстандағы жалпы ішкі өнімнің рекордтық өсімі кезінде халық табысының керісінше төмендеп кеткенін нақты график арқылы көрсеткен. Бұл дерек әлі күнге дейін ресми түрде жоққа шығарылмады.
Осыған ұқсас тағы бір зерттеу жуырда экономист Қуаныш Бейсенгазин тарапынан ұсынылды. Онда экономикалық өсімнің халықтың кең тобына бірдей әсер етпейтіні, яғни инклюзивті еместігі анық көрсетілген. Ел экономикасындағы оң серпіннің барша азаматтың тұрмыс сапасына бірдей әсер етпейтіні – мемлекеттік органдар деңгейіндегі жиындарда ашық айтылмайтын өзекті мәселе.
Қазіргі таңда үкіметтің күн тәртібінде премьер-министрдің әкімдерге жұмыс орындарын құру жөнінде берген тапсырмасы. Алайда бұл – 2024–2029 жылдарға арналған Еңбек нарығын дамытудың тұжырымдамасында қарастырылған міндеттердің бірі.
