BES.media хабарлайды: Қазақстанда тұрғын үйді міндетті сақтандыру 2026 жылы енгізілуі мүмкін. Бұл туралы Премьер-Министрдің орынбасары Қанат Бозымбаев мәлімдеді. «Қазір біз осы бағытты пысықтап жатырмыз. Қаржы реттеуші құрылымында мемлекеттік сақтандыру компаниясын құру көзделіп отыр. Оның жанында есеп беретін ұйым бар, сол ұйымның аясында тәуекелдерді сақтандыратын, тұрғын үй иелерінен түсетін қаражатты жинақтайтын және оларды қайта сақтандырумен айналысатын еншілес кәсіпорын құрылатын болады», – деді Бозымбаев. Оның айтуынша, сақтандыру тарифтерінің нақты мөлшері әзірге белгісіз. Олар тұрғын үйдің құнына, орналасқан жеріне және басқа да параметрлеріне байланысты есептелмек. «Әрине, алыс ауылдағы шағын үй мен Алматы немесе Астанадағы вилланы бірдей мөлшерлемемен бағалау дұрыс емес. Тарифтер әртүрлі болады. Бұл орта табыс деңгейіндегі немесе аз қамтылған азаматтарға айтарлықтай салмақ түсірмейді деп ойлаймыз. Бірақ бұл тәсіл шешуші сәтте – жер сілкінісі, ірі су тасқыны немесе өрт сияқты апат жағдайында қайта сақтандырудың жинақтық қорын қалыптастыруға мүмкіндік береді», – деді Қанат Бозымбаев.
Евразия24 пікірі:
Қазақстанда тұрғын үйді міндетті сақтандырудың енгізілуі уақыт еншісіндегі мәселе еді. 2024 жылғы су тасқынынан кейін Үкімет заңнамаға өзгерістер әзірленіп жатқанын мәлімдеді. Аталған түзетулер аясында табиғи апат қаупі жоғары аймақтардағы тұрғын үй иелеріне жылжымайтын мүлікті міндетті түрде сақтандыру нормасы қарастырылуда. Арада бір жыл өткен соң тұрғын үйді сақтандыру жүйесі 2026 жылдан бастап енгізілетіні белгілі болды. Алайда осы уақытқа дейін сақтандыру тарифтері, шарттары және сақтандыру жағдайы орын алған кезде өтемақы төлеу тәртібі бойынша нақты ақпарат ұсынылған жоқ. Ең маңыздысы – тұрғын үйді сақтандыру үшін азаматтарды төлем жасауға міндеттеу тетігі әзірге нақты айқындалмаған. Қазақстанда жүргізушілер үшін азаматтық-құқықтық жауапкершілікті міндетті сақтандыру тәртібі енгізілген. Бұл талапты орындауды қамтамасыз ететін нақты шаралар да қарастырылған – әкімшілік айыппұлдар мен көлік құралын арнайы тұраққа қою. Соған қарамастан, сақтандырусыз көлік жүргізетіндер әлі де бар. Су тасқыны қаупі бар шалғай елді мекендерде тұратын азаматтарға әсер ету механизмдері қандай болмақ? Egov арқылы айыппұл жолдана ма? Ал егер байланыс желісіне қолжетімділік болмаса ше? Бастама реттелмеген күйінде қалып отыр. Соған қарамастан, іске асыру мерзімі нақты көрсетілген. Осыған байланысты аталған сақтандыру жүйесі қысқа мерзім ішінде дайындықсыз енгізілуі мүмкін деген қауіп бар. Бұл жағдайда азаматтарға заңнамада бекітілген сақтандыру міндеттемелері жүктеліп, олар орындалмаған жағдайда төтенше жағдай туындаған сәтте өтемақы алу құқығынан айырылуы ықтимал. Тиісті өтемақысыз қалған азаматтар саны артқан жағдайда, бұл әлеуметтік саясат жүргізу тұрғысынан күрделі тәуекелге айналуы мүмкін.
