НЬЮ-ЙОРК. 8 тамыз. – АҚШ-тың Швейцариядан импортталатын 1 килограммдық алтын құймаларына кедендік баж салығын енгізетіні жөніндегі хабар аясында алтын бағасы тарихи межеге көтерілді.
Жұма күнгі сауда барысында Comex биржасында желтоқсан айындағы жеткізілімге арналған алтын фьючерстерінің бағасы унциясына 3534,1 АҚШ долларына дейін өсіп, рекорд орнатты. Қазіргі уақытта баға 3484,5 АҚШ доллары деңгейінде саудалануда, бұл алдыңғы күнгі жабылу бағасынан 0,9%-ға жоғары.
АҚШ Кеден және шекара қызметінің мәліметінше, салмағы 1 кг және 100 унция (шамамен 2,8 кг) болатын алтын құймалары 31 шілдеде қабылданған қаулыға сәйкес импорттық баж салығына жататын тауарлар санатына енгізіледі. Бұл жөнінде Financial Times хабарлады.
Сала өкілдері үшін бұл шешім күтпеген жағдай болды. Бұған дейін сарапшылар бұл санаттағы алтын құймалары АҚШ президенті Дональд Трамп енгізген жаңа баж салығына жатпайды деп есептеген.
1 килограммдық құймалар – әлемдегі ең ірі алтын фьючерстер нарығы саналатын Comex саудасында ең көп тараған формат. Олар Швейцариядан АҚШ-қа экспортталатын алтын құймаларының негізгі бөлігін құрайды.
Вашингтон мен Берн арасындағы қарым-қатынас өткен аптада АҚШ-тың Швейцария өнімдеріне 39% көлемінде импорттық баж салығын енгізу туралы мәлімдемесінен кейін нашарлады. Кедендік статистикаға сәйкес, алтын – Швейцарияның АҚШ-қа экспорттайтын негізгі тауарларының бірі.
«Бұған дейін қымбат металдар швейцариялық аффинаж зауыттарында қайта өңделіп, АҚШ-қа баж салығынсыз жеткізіледі деген пікір басым еді», – деді Швейцария Қымбат металдарды өндірушілер және саудагерлер қауымдастығының президенті Кристоф Вильд. Оның айтуынша, жаңа баж енгізу шешімі Швейцария мен АҚШ арасындағы алтын саудасына «тағы бір соққы» болды.
