Астана. 18 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Air Products компаниясының бас атқарушы директоры Эдуардо Менезесмен кездесіп, өнеркәсіптің бірқатар салаларындағы ынтымақтастық перспективаларын талқылады. Бұл туралы Мемлекет басшысының баспасөз қызметі хабарлады.
«Менезес өз компаниясының Қазақстан экономикасына инвестиция салу мүмкіндігін қарастырып жатқанын жеткізді. Атап айтқанда, Air Products газ өңдеу және газ химиясы, сондай-ақ көмірді терең өңдеу салаларындағы жобаларды іске асыруға қызығушылық танытып отыр», – делінген бейсенбі күні таратылған хабарламада.
Тоқаев бұл бастаманы құптап, Қазақстан тарапы қажетті қолдау көрсетуге дайын екенін растады.
Air Products АҚШ-тың ірі компанияларының қатарына кіреді және табиғи газды өңдеу мен өнеркәсіптік газдарды (азот, сутегі және оттегі) өндіру саласындағы халықаралық көшбасшылардың бірі саналады.
