Астана. 18 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Түркі мемлекеттері ұйымына (ТМҰ) мүше елдердің жоғарғы соттары арасындағы өзара іс-қимылды нығайтуға шақырды. Бұл туралы Мемлекет басшысының баспасөз қызметі хабарлады.
«Бұл ұйымға мүше мемлекеттердің сот және құқық қорғау салаларындағы ынтымақтастығы тұрақты түрде нығайып келе жатқанын атап өткен жөн. Ертең Түркістанда өтетін беделді форум соның айқын дәлелі болмақ. Сот жүйесі кез келген өркениетті елдің дамуы мен өркендеуі үшін айрықша маңызға ие. Сондықтан жоғарғы соттар арасындағы байланысты тереңдету бауырлас халықтарымыздың ортақ мүдделеріне толықтай сай келеді», – деді Тоқаев бейсенбі күні Астанада ТМҰ елдерінің жоғарғы соттарының басшыларымен кездесуде.
Президент бүгінде көптеген мемлекеттер заман талабына сай дамуға және жаһандық технологиялық өзгерістерден қалыс қалмауға ұмтылып отырғанын атап өтті.
«Осы бағытта күш-жігерімізді біріктіріп, бірлесіп әрекет етуіміз қажет. Ертең Түркістанда өтетін конференцияда сот саласын цифрландыру, инвесторлардың құқықтарын қорғау және өзге де маңызды мәселелер жан-жақты талқыланады. Мұндай күн тәртібі өте өзекті әрі уақыт талабына сай деп айтуға болады. Осы мәселелер бойынша пікір алмасу ұйымымыздың дамуына тың серпін беріп, оның беделін нығайта түсетіні сөзсіз», – деді Мемлекет басшысы.
Оның айтуынша, Қазақстан ТМҰ аясындағы барлық игі бастамаларды қолдайды және алдағы уақытта да осы бағыттағы ұстанымын сақтайды.
Тоқаев кездесу қатысушыларын Қазақстанда соңғы жылдары жүзеге асырылып жатқан ауқымды реформалармен, сондай-ақ сот және құқық қорғау жүйелерін жаңғырту бағытындағы жұмыстармен таныстырды.
Кездесуге Әзербайжан Жоғарғы сотының төрағасы Инам Керимов, Қырғызстан Жоғарғы сотының төрағасы Медербек Сатыев, Түркия Кассациялық сотының төрағасы Өмер Керкез, Түркия Мемлекеттік кеңесінің төрағасы Зеки Йигит және Өзбекстан Жоғарғы соты төрағасының бірінші орынбасары Алишер Усмановқатысты. Олар ТМҰ-ға мүше елдердің жоғарғы соттарының екінші конференциясына қатысу үшін келген.
