АСТАНА. 30 шілде. ИНТЕРФАКС — Англия банкі базалық пайыздық мөлшерлемені жылдық 3,75% деңгейінде өзгеріссіз қалдырды. Бұл туралы Ұлыбританияның орталық банкі хабарлады.
Қабылданған шешім экономистер мен сарапшылардың басым бөлігінің болжамына сәйкес келді.
Ақша-кредит саясаты комитетінің (MPC) тоғыз мүшесінің алтауы мөлшерлемені өзгеріссіз қалдыруды қолдады. Ал Хью Пилл, Меган Грин және Кэтрин Манн оны 25 базистік тармаққа көтеруді жақтады. Маусым айындағы отырыста мөлшерлемені арттыруды тек Хью Пилл мен Меган Грин ғана қолдаған болатын.
Осылайша, Англия банкі алтыншы отырыс қатарынан базалық мөлшерлемені өзгеріссіз қалдырып отыр. Соңғы рет реттеуші оны 2025 жылдың желтоқсанында 25 базистік тармаққа төмендетіп, 2023 жылдың ақпанынан бергі ең төменгі деңгей – 3,75%-ға түсірген еді.
Орталық банктің мәлімдеуінше, Таяу Шығыстағы ахуалға байланысты мұнай мен мұнай өнімдерінің бағасы әлі де құбылмалы болып қалып отыр және қақтығысқа дейінгі деңгейден жоғары.
«Энергия ресурстары бағасының күрт өзгеруінің Ұлыбритания экономикасына ықпалы әзірге нақты бағаланған жоқ», – делінген реттеушінің отырыс қорытындысы бойынша жариялаған хабарламасында.
Англия банкі ақша-кредит саясаты энергия тасымалдаушылар бағасына тікелей әсер ете алмайтынын, алайда экономиканың осы өзгерістерге бейімделуіне және инфляцияны 2% мақсатты деңгейіне қайтаруға бағытталғанын атап өтті.
Реттеушінің мәліметінше, қажетті саясат бағыты энергетикалық күйзелістің ауқымы мен ұзақтығына, сондай-ақ оның қаржы нарығы мен жалпы экономикаға таралу деңгейіне байланысты айқындалады.
Ұлыбританияда маусым айында жылдық инфляция 2,8%-дан 2,6%-ға дейін баяулаған. Соған қарамастан, Англия банкі энергия бағасының жоғары болуы басқа секторларға да әсерін тигізетіндіктен, биылғы жылдың соңына қарай инфляция қайта үдейді деп күтеді.
Орталық банк энергия бағасының ұзақ уақыт жоғары деңгейде сақталуы баға белгілеу мен еңбекақының өсуіне жанама ықпал ету қаупін күшейтетінін атап өтті. Дегенмен әзірге мұндай үрдістердің айқын белгілері байқалмайды, ал соңғы статистика инфляциялық қысымның біртіндеп бәсеңдеп келе жатқанын көрсетеді.
Сондай-ақ Ұлыбританиядағы еңбек нарығындағы ахуалдың біртіндеп жұмсаруы және пайыздық мөлшерлемелердің қақтығысқа дейінгі кезеңмен салыстырғанда жоғары деңгейде сақталуы баға өсімінің баяулауына ықпал етеді деп күтілуде.
Сонымен бірге реттеуші инфляция болжамына қатысты тәуекелдердің жоғарылау жағына қарай басым екенін, алайда Таяу Шығыстағы жағдайдың өзгеруіне байланысты болжам қайта қаралуы мүмкін екенін мәлімдеді.
«Комитет инфляцияны орта мерзімді кезеңде 2% мақсатты деңгейіне жеткізу үшін қажет болған жағдайда тиісті шараларды қабылдауға дайын», – делінген Англия банкі хабарламасында.
Реттеушінің орталық болжамына сәйкес, инфляция биылғы үшінші тоқсанда 2,9%-ға, ал төртінші тоқсанда шамамен 3,2%-ға дейін өседі. 2027 жылдың төртінші тоқсанында ол 2,1%, ал 2028 жылдың соңында 1,9% деңгейінде болады деп күтіледі.
Сондай-ақ Англия банкі Ұлыбритания экономикасы 2026 және 2027 жылдары 1,1%-ға, ал 2028 жылы 1,7%-ға өседі деп болжап отыр.
Англия банкі шешімінен кейін FTSE 100 индексі 0,29%-ға көтерілді. Ал фунт стерлинг АҚШ долларына қатысты 0,05%-ға нығайып, 1,3375 доллар деңгейінде саудаланды.
