АСТАНА. 5 тамыз. ИНТЕРФАКС-ҚАЗАҚСТАН – Қазақстанда пилоттық жоба аясында Павлодар, Көкшетау және Ақкөл қалаларында атаулы әлеуметтік көмек (АӘК) алатын 5 мыңнан астам азаматқа сауда үстемесіз азық-түлік тауарларын сатып алуға мүмкіндік беретін ваучерлер ұсынылады. Бұл туралы Сауда және интеграция министрі Арман Шаққалиев мәлім етті.
«Пилоттық жоба аясында АӘК алушыларға азық-түлік ваучерлері беріледі. Олар әлеуметтік маңызы бар азық-түлік тауарларын (ӘМАТ) көтерме бағамен, сауда үстемесінсіз сатып алуға мүмкіндік береді. Жоба Ақкөл, Көкшетау және Павлодар қалаларында іске асырылады. Қатысушылар саны шамамен 5 мың адам», – делінген министрдің Үкімет отырысында таныстырған баяндамасында.
Министрдің айтуынша, бұл бастама Парламент депутаттарының өңірлерге сапары барысында қолдау тауып, сондай-ақ қоғамдық талқылаудан да сәтті өткен.
Сонымен қатар, елімізде «үй жанындағы дүкендердегі» бағаға бақылау күшейтіледі.
«Әлеуметтік маңызы бар азық-түлік тауарларына белгіленген 15% сауда үстемесіне бақылау шараларын күшейтуге көшеміз. Сонымен қатар, ӘМАТ бағасына талдау жүргізуге мүмкіндік беретін модуль жүзеге асырылуда, бұл тиімді басқарушылық шешімдер қабылдауға жол ашады», – деді Шаққалиев, – деп хабарлады Үкіметтің баспасөз қызметі.
