Дубай. 3 тамыз. ИНТЕРФАКС – АҚШ Ирактағы «Ислам мемлекетіне» (Қазақстанда және бірқатар елдерде террористік ұйым ретінде танылған) қарсы халықаралық коалицияның түрлі әскери нысандарынан әскери қызметкерлер мен техниканы Ирак Күрдістанындағы Эрбиль халықаралық әуежайына көшіріп жатыр. Бұл туралы The National басылымы дереккөздерге сілтеме жасап хабарлады.
Басылымның мәліметінше, бұл әрекеттің АҚШ әскерінің Ирактан толық шығарылатынын білдіретіні әзірге белгісіз. Алайда Бағдад пен Эрбильдегі дереккөздердің айтуынша, өткен аптада әскери қызметкерлер коалиция нысандарынан қорғаныс жүйелері мен қосалқы жабдықтарды Эрбиль халықаралық әуежайына тасымалдаған.
Атап айтқанда, әңгіме әуе шабуылына қарсы қорғаныс жүйелерінің элементтері туралы болып отыр. Сондай-ақ дереккөздердің мәліметінше, коалиция құрамында қызмет еткен Ұлыбритания, Франция және Германия әскери қызметшілерінің бір бөлігі Эрбильден кеткен.
Күрдістан өңірінің екі лауазымды тұлғасы шілде айының соңында Ирак Күрдістанындағы коалиция күштерінің негізгі орталығы саналатын Эрбиль әскери-әуе базасынан зымыранға қарсы тосқауыл қоюға арналған зымырандар тиелген колонналардың шығарылғанын мәлімдеген.
«Бұл – күштердің әдеттегі орын ауыстыруы емес. Белгілі бір орында орналастырылған қорғаныс жүйелерінің көлікке тиеліп, әкетіліп жатқанын көріп отырмыз», – деді дереккөздердің бірі.
Оның айтуынша, Ирак Күрдістанының билігіне күштерді қайта орналастыру туралы алдын ала ешқандай хабарлама берілмеген.
The National басылымы Ирак пен АҚШ 2024 жылы халықаралық коалицияның әскери миссиясын 2026 жылғы 30 қыркүйекке дейін аяқтау туралы келісімге келгенін еске салады. Тараптар бұдан кейінгі америкалық әскери қатысу Бағдад пен Вашингтон арасындағы екіжақты келісімдер негізінде жүзеге асырылып, негізінен әскери даярлық, барлау мәліметтерімен алмасу және қару-жарақ жеткізу бағыттарына шоғырланатыны жөнінде уағдаласқан.
Сонымен бірге өңірдегі қақтығыс басталғалы бері АҚШ-тың Ирактағы әскери нысандарына Иранмен байланысы бар ирактық қарулы топтар немесе Иран аумағынан бірнеше мәрте шабуыл жасалған. Соның салдарынан бірнеше америкалық әскери қызметкер мен бейбіт тұрғын қаза тауып немесе жараланған.
