Вашингтон. 11 шілде. ИНТЕРФАКС-ҚАЗАҚСТАН – АҚШ президенті Дональд Трамп 1 тамыздан бастап Канададан АҚШ-қа тасымалданатын өнімдерге 35% мөлшерінде кедендік баж салығы салынатынын мәлімдеді.
«1 тамыздан бастап Канададан АҚШ-қа жеткізілетін тауарларға, жалпы салалық баж салықтарынан бөлек, 35% көлемінде кедендік алым алатын боламыз», – делінген Трамптың Канада премьер-министрі Марк Карниге жолдаған хатына, ол Truth Social әлеуметтік желісінде жарияланды.
АҚШ басшысы атап өткендей, егер канадалық компаниялар өндірістерін АҚШ аумағына көшірсе, бұл салықтар қолданылмайды.
«Егер сіздер қандай да бір себеппен жауап ретінде баж салығын көтеруді шешсеңіздер, біз сіздердің пайыздық мөлшерлемелеріңізді 35%-дық салыққа қосып, тиісінше жауап қайтарамыз», – деп ескертті Трамп.
Бұған дейін АҚШ биыл Канададан әкелінетін кейбір тауарларға 25% мөлшерінде тариф енгізген болатын. Бұл шара мұнай мен энергетикалық өнімдерге таралмайды – оларға 10% көлемінде баж салығы қолданылады. Наурыз айында Трамп бұл салықты уақытша кейінге шегеруге келіскен еді. Сонымен қатар, АҚШ тарапы Канада өнімдеріне қатысты болат, алюминий және автокөлік секторына қатысты жалпы тарифтерді қолдануға шешім қабылдаған.
АҚШ әкімшілігінің мәліметінше, мұндай шаралар Канада арқылы АҚШ-қа заңсыз тасымалданатын фентанилмен күрестің әлсіздігіне байланысты қабылданып отыр.
