Вашингтон. 11 желтоқсан. ИНТЕРФАКС – The Wall Street Journal басылымы дереккөздерге сілтеме жасай отырып хабарлағандай, соңғы уақытта АҚШ әкімшілігі бейбіт бастамалармен қатар еуропалық әріптестеріне Украинада соғыстан кейінгі қалпына келтіру жұмыстары мен Ресейдің жаһандық экономикаға қайта қосылу мүмкіндіктері жөнінде бірнеше ұсыныс жасаған.
Басылымның жазуынша, «Дональд Трамп әкімшілігі соңғы апталарда еуропалық әріптестеріне бір беттік бірнеше құжат жолдаған. Онда Украина қалпына келтіру және Ресейдің әлемдік экономикаға оралуына қатысты АҚШ-тың көзқарасы баяндалған». Бұл құжаттар АҚШ-тың қазіргі бейбіт бастамаларымен қатар берілген қосымша материалдар түрінде ұсынылған.
Газетте көрсетілгендей, ұсынылған материалдарда америкалық қаржы компаниялары мен өзге де ірі кәсіпорындардың Украинадағы жобалар үшін шамамен 200 миллиард доллар көлеміндегі Ресейдің бұғатталған активтерін тарту жоспары егжей-тегжейлі сипатталған.
Тағы бір қосымшада АҚШ-тың «Ресей экономикасын дағдарыстан шығару жөніндегі жалпы көзқарасы» берілген. Онда АҚШ компаниялары сирек жер металдарын өндіруден бастап Арктикадағы мұнай ұңғымаларын бұрғылауға дейінгі стратегиялық салаларға инвестиция салып, Ресейдің энергия ресурстарын Батыс Еуропа мен өзге нарықтарға қайта жеткізуіне көмектесетіні айтылған.
The Wall Street Journal бұл ұсыныстар АҚШ пен оның дәстүрлі еуропалық одақтастары арасындағы келіссөздер барысында айтарлықтай келіспеушілік тудырғанын жазады. Басылымның пайымдауынша, мұндай жоспарлар Еуропаның экономикалық картасын түбегейлі өзгертуі мүмкін.
Сондай-ақ басылым қазіргі келіссөздер тек аумақтық мәселелерге емес, бизнес мүдделеріне де қатысты күрделі текетіреске айналып отырғанына назар аударады. «Бұл текетірес Украина мен Ресейді ғана емес, АҚШ пен оның дәстүрлі еуропалық одақтастарын да қарама-қарсы қоя бастады», – деп жазады басылым.
