Мәскеу. 11 желтоқсан. ИНТЕРФАКС – Бейсенбі күнгі сауда барысында мұнай бағасы тұрақты күйінде қалды. Нарық қатысушылары Ресей мен Украина арасындағы қақтығысты реттеу жөніндегі жаңалықтарды, сондай-ақ Венесуэла төңірегіндегі жағдайды бағалап отыр.
Лондондағы ICE Futures биржасында ақпан айына арналған Brent маркалы мұнай фьючерстерінің құны Нұр-Сұлтан уақытымен сағат 11:20-да барреліне $62,15 болды. Бұл алдыңғы сауда күнімен салыстырғанда $0,06-ға немесе 0,1%-ға төмен. Сәрсенбі күні бұл келісімшарттар $0,27-ға (0,44%) өсіп, $62,21 деңгейіне жеткен болатын.
WTI маркалы мұнайдың қаңтар айына арналған фьючерстері Нью-Йорктің NYMEX электронды сауда алаңында осы уақытта $0,03-қа (0,05%) арзандап, барреліне $58,43 құрады. Бұған дейінгі сессия қорытындысында бұл келісімшарттар $0,21-ға (0,36%) өсіп, $58,46 болған еді.
АҚШ президенті Дональд Трамп Ресеймен арадағы қақтығысты реттеу бойынша Украина нақты нәтижеге қол жеткізу мүмкіндігін шынайы бағалауы қажет екенін айтты. “Олар шынайы көзқарас ұстануы керек”, – деді Трамп сәрсенбі күні Ақ үйде журналистерге. Бұған дейін ол Украина бұл қақтығыста жеңіліп жатқанын, сондықтан келіссөздер барысында белгілі бір талаптарды қабылдауға тура келетінін мәлімдеген болатын.
Трамп жуырда Украина мәселесін Франция президенті Эммануэль Макронмен, Ұлыбритания премьер-министрі Кир Стармермен және Германия канцлері Фридрих Мерцпен талқылаған. Ол алдағы демалыс күндері Еуропада Украинаға қатысты келіссөздер өтетінін де хабарлады.
Сәрсенбі күні нарыққа қолдау көрсеткен факторлардың бірі – АҚШ әскерилері санкцияға ұшыраған Венесуэла мен Ираннан мұнай тасымалдаған танкерді ұстағаны жөніндегі ақпарат болды.
Сонымен қатар, Федералды резерв жүйесінің базалық мөлшерлемені төмендету туралы шешімі де мұнай нарығына оң әсер етіп, АҚШ экономикасының және мұнайға деген сұраныстың болашағына қатысты трейдерлердің оптимизмін арттырды.
