Астана. 16 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ауғанстан бойынша өзінің арнайы өкілі Еркін Тұқұмовқа бұл елмен өзара іс-қимылды, ең алдымен сауда-экономикалық және гуманитарлық бағыттарда дамытуға ықпал етуді тапсырды. Бұл туралы Мемлекет басшысының баспасөз қызметі сәрсенбі күні хабарлады.
Мемлекет басшысы арнайы өкілді қабылдау барысында Ауғанстанның қазіргі билік өкілдерімен екіжақты қатынастардың даму жағдайына тоқталып, бұл үдерістегі арнайы өкілдің ерекше маңызын атап өтті.
«Арнайы өкілге Ауғанстанмен тиімді өзара іс-қимылды жолға қою, әсіресе сауда, экономика және гуманитарлық салаларда ынтымақтастықты кеңейту міндеті жүктелді», – делінген ресми ақпаратта.
Сонымен қатар Президент Алматы қаласында орналасқан Орталық Азия мен Ауғанстан бойынша БҰҰ-ның Тұрақты даму мақсаттары жөніндегі Өңірлік орталығының әлеуетін барынша тиімді пайдалану қажеттігіне назар аударды.
Хабарламада көрсетілгендей, Қасым-Жомарт Тоқаев Қазақстанның Ауғанстанда бейбітшілік пен тұрақтылықты қамтамасыз етуге бағытталған гуманитарлық және білім беру бастамаларын жалғастыра беретінін мәлімдеді.
Еркін Тұқұмов 2025 жылдың маусым айында Қазақстан Президентінің Ауғанстан жөніндегі арнайы өкілі болып тағайындалған болатын.
