АСТАНА. 1 қаңтар. ИНТЕРФАКС-ҚАЗАҚСТАН – 2026 жылғы 1 қаңтардан бастап Еуразиялық экономикалық одақтағы (ЕАЭО) төрағалық ету міндеті Беларусь Республикасынан Қазақстан Республикасына ресми түрде өтті.
Жоспарға сәйкес, Жоғары Еуразиялық экономикалық кеңестің келесі отырысы 2026 жылғы 28–29 мамырда Астанада өтеді.
Бұған дейін Қазақстан президенті Қасым-Жомарт Тоқаев еліміздің Одақтағы төрағалығы кезеңіндегі басым бағыттарын айқындаған болатын. Атап айтқанда, Мемлекет басшысы Қазақстанның 2026 жылғы төрағалығы аясында бес негізгі салаға басымдық беретінін мәлімдеді. Олар: жасанды интеллектті дамыту, Еуразиялық логистикалық хабты қалыптастыру, өнеркәсіп пен агроөнеркәсіптік кешенді цифрландыру, тосқауылсыз сауданы қамтамасыз ету, сауданың жаңа географиясын кеңейту.
Бұл бағыттар Одақ ішіндегі интеграцияны тереңдетуге және мүше мемлекеттер арасындағы экономикалық байланысты нығайтуға бағытталған.
