Дубай. 9 қыркүйек. ИНТЕРФАКС – Эфиопияда «Ұлы эфиопиялық қайта өрлеу» атты ГЭС ресми түрде ашылды. Бұл — Африкадағы ең ірі гидроэлектр станциясы. Ол Көк Ніл өзенінде орналасқан.
БАҚ мәліметінше, ашылу салтанаты сейсенбі күні Губе қаласында өтіп, оған Эфиопия премьер-министрі Абий Ахмедпен бірге Сомали, Джибути және Кения президенттері қатысты.
ГЭС құрылысы Египет пен Суданмен көпжылдық келіспеушілікке себеп болған. Үш бөгеттен тұратын гидротехникалық кешеннің құрылысы 2011 жылы басталған. Сарапшылардың бағалауынша, жобаға шамамен 5 миллиард доллар жұмсалған.
Египет пен Судан бұл жобаның өз елдеріндегі су қауіпсіздігіне қатер төндіретінін айтып, алаңдаушылық білдіріп келеді. Себебі Египеттің ауызсуының 90%-ы Ніл өзенінен алынады. Ал өзеннің ағысына кез келген өзгеріс ел үшін стратегиялық қауіп саналады.
Эфиопия, Египет және Судан арасында бұл мәселе бойынша бірнеше тарапты келіссөздер жүргізілді: алдымен техникалық деңгейде, кейін мемлекет басшылары мен халықаралық делдалдардың (Африка одағы, АҚШ, Дүниежүзілік банк) қатысуымен. Алайда ортақ келісімге келу мүмкін болмады.
