БРЮССЕЛЬ. 4 қыркүйек. ИНТЕРФАКС — Жұма күні Дублинде өтіп жатқан ЕО-ның Жалпы мәселелер жөніндегі бейресми кеңесінде одақты кеңейту үдерісінде қалыптасқан тоқыраудан шығу жолдары бірнеше айдан бері алғаш рет кеңінен талқыланып жатыр, деп жазды Politico.
ЕО елдерінің еуропалық мәселелер жөніндегі министрлері Молдова мен Украинаны қоса алғанда, мүшелікке кандидат және ықтимал кандидат тоғыз елдің өкілдерімен олардың Еуропалық одаққа кіру үдерісін жетілдіру мүмкіндіктерін талқылауда.
Басылымның жазуынша, ЕО-ны кеңейту бастамасы кең қолдау тапқанымен, Берлин, Париж және Гаага бастаған бірқатар ел жаңа мүшелерді тым жылдам қабылдау кейін қиындық тудыруы мүмкін деп қауіптенеді. Сондықтан жаңа мүше одақ жұмысына кедергі келтірмеуі үшін алдын ала тиісті ережелер әзірлеу қажет деп санайды.
«Бұл ережелерді әзірлеу — Еуропалық комиссияның (ЕК) міндеті. Комиссия тиісті шешім тапқанға дейін бүкіл үдерістің болашағы бұлыңғыр күйінде қалады. “Кері кеңею” секілді ұсыныстарды мүше мемлекеттердің астаналары қолдамады», — делінген мақалада.
Politico мәліметінше, министрлер кездесуіне қатысып отырған ЕО-ның кеңею мәселелері жөніндегі комиссары Марта Кос алдағы кезеңді «кеңею күзі» деп атады. Қазір ол одақ ережелерін бұзған немесе негізгі саяси бастамаларға кедергі келтірген жағдайда жаңа мүшелердің белгілі бір құқықтарын шектеу жөнінде ұсыныстар әзірлеп жатыр. Алайда бұл тетіктің нақты қалай жұмыс істейтіні әзірге жарияланған жоқ.
Дублиндегі кездесуге төрағалық етіп отырған, ЕО Кеңесіне төраға Ирландияның Еуропа істері жөніндегі министрі Томас Бирн жоспар ай соңына дейін ұсынылады деп күтіліп отырғанын айтты. Оның сөзінше, бүгінгі кездесу оның мазмұнын келісуге мүмкіндік береді.
Сонымен қатар Politico Исландияда өткен референдумда елдің Еуроодаққа кіру жөніндегі келіссөздерді қайта бастау ұсынысы қолдау таппағанын еске салды. Кездесуге қатысушылардың пікірінше, бұл жағдай ЕО-ны кеңейту саясаты үшін «алаңдатарлық белгі» болды.
