МӘСКЕУ. 15 қыркүйек. ИНТЕРФАКС – Еуропаның тоғыз елі автоматтандырылған кіру және шығу жүйесі (EES) аясында шекарадағы биометриялық бақылауды енгізуді белгісіз мерзімге шегерді, деп хабарлайды The Independent.
Басылымның жазуынша, жазда Еуропа әуежайларында EES биометриялық жүйесінің енгізілуіне байланысты ұзын-сонар кезек пайда болған. Осыдан кейін Франция, Бельгия, Нидерланд, Германия, Грекия, Мальта, Португалия, Италия және Швейцария жаңа тәртіпті кейінге қалдыруға шешім қабылдаған. Бұл туристердің шекарадан кедергісіз өтуін қамтамасыз ету үшін жасалып отыр.
EES жүйесі 2025 жылғы қазанда іске қосылып, биыл сәуірде толық қолданысқа енгізіледі деп жоспарланған еді. Кейін елдерге 150 күндік өтпелі кезең берілді. Осы уақыт аралығында әуежайларда жолаушылар легі шамадан тыс көбейген жағдайда биометриялық тексеруді уақытша тоқтатуға мүмкіндік болды.
«Өтпелі кезең 6 қыркүйекте аяқталғанына қарамастан, тоғыз ел Еурокомиссияға биометриялық бақылауға қажетті технологиялар мен бағдарламалық жасақтама толық әрі тұрақты жұмыс істегенге дейін жаңа тәртіпті енгізбейтінін хабарлады», – деп жазады The Independent.
Алайда бұл шешім Брюссельдегі Eurostar терминалы мен Антверпен портына, сондай-ақ Франкфурт және Амстердамдағы Схипхол әуежайларына қатысты емес. Бұл нысандарда биометриялық бақылау қолданыла береді.
Еуропалық әуе компаниялары мен әуежайлардың басшылары да шекарадағы биометриялық бақылауды кемінде 2027 жылғы сәуірге дейін кейінге қалдыру қажет деп санайды. Осы уақыт ішінде қызметкерлер санын көбейтіп, EES жүйесінің тұрақты жұмысын қамтамасыз ету көзделіп отыр.
Автоматтандырылған кіру және шығу жүйесі (EES) Шенген аймағына Еуроодаққа кірмейтін елдерден келетін азаматтарды бақылауға арналған. Бұл тәртіп 180 күн ішінде 90 күннен аспайтын қысқа мерзімді сапарларға қолданылады.
Шенген аймағына алғаш кірген кезде үшінші елдердің азаматтарынан биометриялық деректер алынады. Жолаушының жеке мәліметтері электрондық жүйеге енгізіледі. Паспортқа бұрынғыдай мөр басудың орнына құжат электрондық құрылғы арқылы тексеріледі. Жүйе адамның бұған дейін тіркелген-тіркелмегенін автоматты түрде анықтайды.
Шенген елдері арасындағы кейінгі сапарларда биометриялық деректер қайта алынбайды. Entry/Exit System базасындағы мәліметтер үш жыл сақталады, содан кейін оларды қайта жаңарту қажет.
