АСТАНА. 15 қыркүйек. ИНТЕРФАКС-ҚАЗАҚСТАН – Корея Республикасының президенті Ли Чжэ Мён генерал Хон Бом Доның сүйегін тарихи отанына қайтаруға қолдау көрсеткені үшін Қазақстан Президенті Қасым-Жомарт Тоқаевқа алғыс білдірді.
«Корея тарихында және қиын кезеңдерде корей халқын қорғауда ерекше рөл атқарған генерал Хон Бом Доның сүйегін елге қайтару туралы шешім қабылдағаныңыз үшін алғыс айтамыз», – деді Ли Чжэ Мён Сеулде Қасым-Жомарт Тоқаевпен өткен келіссөзде.
«Кезінде Қазақстан корейлерді жылы қабылдады. Бұл үшін Сізге және бүкіл қазақ халқына ризашылығымызды білдіреміз», – деді Корея президенті.
Қасым-Жомарт Тоқаев та генерал Хон Бом Доның тарихи тұлғасына арнайы тоқталды.
«Мен генерал Хон Бом Доның тарихын жақсы білемін. Ол – нағыз батыр, отаншыл тұлға. Оның есімін ұлықтау екі халыққа ортақ парасаттың көрінісі болды деп нық сеніммен айтуға болады. Бір ғасырдан астам уақыт өтсе де, корей халқы өз генералын ұмытпағаны таңғалдырады. Біз оның рухына тағзым етіп, сүйегін туған еліне қайтардық. Осылайша азаматтық парызымызды орындадық», – деді Қазақстан Президенті.
Кеңейтілген құрамдағы келіссөз барысында Ли Чжэ Мён 2021 жылы Кореяның ұлттық батыры генерал Хон Бом Доның сүйегін елге қайтаруға белсенді қолдау көрсеткені үшін Қасым-Жомарт Тоқаевқа тағы да алғыс айтты. Оның сөзінше, «корей халқы бұл ізгі қадамды ұмытпайды әрі жоғары бағалайды».
Хон Бом До (1868 жылы туған) – корей саяси қайраткері, революционер әрі қолбасшы, жапон басқыншыларына қарсы қарулы күресті бастаған тұлғалардың бірі. Ол Кеңестік Қиыр Шығыстағы Азамат соғысына қатысқан. Соғыс аяқталғаннан кейін Кеңес Одағында қалып, қоғамдық өмірге араласты. Корейлерді күштеп қоныс аудару кезінде Қазақстанға жер аударылды. 1943 жылы Қазақ КСР-інің Қызылорда қаласында қайтыс болды.
