Берлин. 13 қараша. ИНТЕРФАКС – Германия Федеративтік Республикасының билеуші коалициясы әскери қызметке шақыру ережелерінің негізгі тармақтарын бекітті. Әзірге әскери қызмет ерікті түрде қала береді, деп мәлімдеді бейсенбі күні Бундестагтағы партиялық фракциялардың жетекшілері бірлескен баспасөз мәслихатында.
«Біз еріктілік принципін ұстануды табандылықпен жалғастырамыз. Егер бұл жеткіліксіз болып шықса, онда міндетті әскерге шақыру қажет болады. Бұл үшін қосымша заңнамалық реттеу талап етіледі», – деді ХДС/ХСС фракциясының жетекшісі Йенс Шпан журналистерге.
Қазіргі таңда әскери борышты өтеу ерікті негізде сақталады, алайда бұл — рекруттардың қажетті саны қамтамасыз етілген жағдайда ғана мүмкін.
«2008 жылы және одан кейін туған барлық жасөспірімдер Бундесверде қызмет етуге дайындықтарын көрсететін сауалнаманы толтыруы тиіс. (…) 18 жасқа толған барлық ер азаматтар міндетті медициналық тексеруден өтеді. 12 айдан астам мерзімге шақырылғандар “міндетті әскери қызметшілер” деп саналса, қысқа мерзімде қызмет өтейтіндер “ерікті әскери қызметшілер” мәртебесін алады», – деп жазады Stern журналы жоспардан үзінді келтіре отырып.
Журналдың жазуынша, Германия Қарулы күштерінің жаңа кадрларға қажеттілігі нақты межелер арқылы анықталатын болады. 2035 жылға дейін ел билігі НАТО аясындағы міндеттемелеріне сай жұмыс жүргізуді жоспарлап отыр. Егер бұл межелер белгіленген мерзімде орындалмаса, үкімет жалпыға бірдей әскери борышты қайтару мәселесін қайта көтереді.
НАТО Бас хатшысы Марк Рютте бейсенбі күні Германияның әскери қызмет реформасы бойынша қадамдарын құптайтынын мәлімдеді.
Биыл тамыз айында Германия үкіметі Қорғаныс министрі Борис Писториус ұсынған әскери қызметке ерікті негізде шақыру туралы заң жобасын мақұлдаған болатын. Маусым айында Писториус Бундесвердің жеке құрамын қазіргі 182 мыңнан 60 мың адамға көбейту қажет екенін айтқан еді — бұл шамамен үштен бірге арттыруды көздейді.
Еске сала кетейік, Германияда жалпыға бірдей әскери міндет 2011 жылы тоқтатылған болатын.
