ДУБАЙ. 14 қыркүйек. ИНТЕРФАКС – Йемендегі «Ансар Аллах» қозғалысы (хуситтер) Сауд Арабиясының оңтүстік-батысындағы Король Халид атындағы әскери әуе базасына ауқымды шабуыл жасағанын мәлімдеді. Бұл туралы қозғалыстың әскери өкілі генерал Яхья Сари айтты.
«Әл-Жазира» телеарнасының хабарлауынша, Яхья Сари Хамис-Мушайттағы әскери базаға ондаған баллистикалық зымыран мен дронмен соққы жасалғанын мәлімдеді. Шабуыл кезінде ұшақ ангарлары, радиолокациялық қондырғылар, ұшу-қону жолақтары мен оқ-дәрі қоймалары нысанаға алынған.
Хуситтер өкілінің айтуынша, шабуылдан әскери база едәуір зақымданған. Ол мұны Сауд Арабиясы әскери-әуе күштерінің кейінгі бес күнде Йеменге 300-ден астам әуе соққысын жасауына жауап деп түсіндірді. Сондай-ақ Сауд Арабиясын қолдайтын күштер хуситтер бақылауындағы аумақтардың қоршауын тоқтатпайынша, қарулы күрес жалғасатынын мәлімдеді.
Ал The National басылымына пікір білдірген Йемендегі әскери дереккөз хуситтердің жуырда басып алған елдің батыс жағалауында күштерін қайта топтастырып жатқанын айтты. Бұған әуе шабуылдарынан келген елеулі шығын себеп болған.
«Бұл – жағалаудағы ашық, шөлейт аумақ. Сондықтан хуситтер әуе шабуылына ұшырамау үшін көзге түспеуге тырысып жатыр», – деді дереккөз.
Бұған дейін Йемен қарулы күштері осы аумақтағы шайқастарға байланысты тұрғындарды Таиз – Моха және Моха – Дхубаб тасжолдарымен жүрмеуге шақырған.
Йемендегі қарулы қақтығыс 2014 жылы басталды. 2022 жылдан кейін елдегі ұрыс біршама бәсеңдеген еді. Алайда 2026 жылғы шілдеден бастап үкімет әскері мен хуситтер арасындағы шайқас елдің әр өңірінде қайта күшейді.
Өткен аптада хуситтер шабуылға шығып, Йеменнің Қызыл теңіз бойындағы жағалауын түгелдей бақылауына алды. Баб-эль-Мандеб бұғазына іргелес аумақтар, сондай-ақ Перим мен Зукар аралдары да олардың қолына өтті.
