Дубай. 27 маусым. ИНТЕРФАКС – АҚШ-тың Иранға жасаған соққылары БҰҰ Жарғысын және Иран мен АҚШ арасындағы өзара түсіністік туралы меморандумның талаптарын бұзады. Бұл туралы Иран Сыртқы істер министрлігі мәлімдеді.
«Иранның жағалаудағы бақылау нысандарына бағытталған бұл қатыгез шабуылдар БҰҰ Жарғысының 2-бабының 4-тармағын өрескел бұзу болып табылады. Сонымен қатар олар соғысты тоқтату туралы меморандумның бірінші тармағын тікелей бұзады», – делінген Иран СІМ-нің сенбі күні ведомствоның Telegram-арнасында жарияланған мәлімдемесінде.
Құжатта Израильдің АҚШ-пен үйлестірілген әрекет аясында Ливанға шабуыл жасағаны да аталған меморандумның бірінші тармағын өрескел бұзу екені айтылған.
«Иран Ислам Республикасы өзінің егемендігін, қауіпсіздігін және ұлттық мүдделерін қорғау үшін барлық қажетті шараларды қабылдайды», – делінген мәлімдемеде.
Сыртқы істер министрлігі Иранның жауап ретінде жасаған соққылары қорғаныс сипатында болғанын атап өтті.
«Қалыптасқан жағдайдың салдары үшін жауапкершілік агрессорға және өз міндеттемелерін бұзған тарапқа – АҚШ-қа, сондай-ақ АҚШ-тың Иранға қарсы агрессиялық әрекеттеріне қандай да бір түрде жәрдемдескен барлық тараптарға жүктеледі», – деп мәлімдеді Иран СІМ.
Сондай-ақ Иран сыртқы саяси ведомствосы Парсы шығанағының оңтүстік жағалауындағы барлық мемлекеттерді өз аумағы мен ресурстарының Иранға қарсы агрессиялық әрекеттер жасау үшін пайдаланылуына жол бермеуге шақырды.мм
