Вашингтон. 31 желтоқсан. ИНТЕРФАКС – Израиль Премьер-министрі Биньямин Нетаньяху Иранмен арадағы жағдайды шиеленістіруге мүдделі емес екенін мәлімдеді.
«Біз қақтығысты күшейтуге ұмтылып отырған жоқпыз. Тегеран да осы ұстанымды қолдайды деп сенемін», – деді ол Fox News арнасына берген сұхбатында.
Нетаньяху соңғы уақытта Иранның зымыран сынақтарын жиілеткенін айтып, Тегеранға мұндай әрекеттерден аулақ болуға кеңес берді.
«Мен олардың бұл жолы қателікке бой алдырмайтынына үміттенемін», – деп атап өтті премьер-министр.
Сұхбат барысында жүргізуші Нетаньяхудан маусым айында жасалған бомбалау әрекеттерінен кейін Иранның ядролық және зымырандық әлеуетін қаншалықты қалпына келтіре алғаны жөнінде сұрады. Премьер-министр: «Әрекет етіп жатыр… Сонымен қатар, зымыран өндірісін де қайта жандандыруға тырысуда», – деп жауап берді.
Оның айтуынша, Тегеранда баллистикалық зымыран өндірісіне қайта кірісу байқалуда. «Ядролық бағдарламаға келер болсақ – олар әрекет жасап жатыр. Бірақ мен олардың нақты шешім қабылдағанына сенімді емеспін, өйткені олар Президент Трамптың ескертуін естіді және өткен жылғы тәжірибеден сабақ алған болар», – деді Нетаньяху.
Бұған дейін АҚШ Президенті Дональд Трамп Тегеран тарапынан ядролық бағдарламаны қайта жандандыру әрекеттері болған жағдайда, салдары өте ауыр болатынын ескерткен еді.
«Егер бұл расталса – салдары болады. Өте ауыр салдарға әкелуі мүмкін», – деген еді Трамп Мар-а-Лаго резиденциясында Нетаньяхумен өткізген бірлескен баспасөз мәслихатында.
Трамптың бұл мәлімдемесіне жауап ретінде Иранның Жоғарғы көшбасшысы аятолла Әли Хаменеи кеңесінің саяси кеңесшісі Али Шамхани Тегеран қандай да бір агрессияға қарсы шара қабылдайтынын мәлімдеді.
Еске сала кетейік, Израиль 13 маусымда Иранға қарсы әскери операцияны бастағанын хабарлаған болатын. Бұл қадамның басты мақсаты – Тегеранның ядролық бағдарламасын жою деп көрсетілді. Жауап ретінде Иран Израиль аумағына соққылар жасады. Ал 22 маусым күні АҚШ Иранның үш ядролық нысанына – Фордо, Исфахан және Натанз қалаларындағы объектілерге әуе шабуылдарын ұйымдастырды. Осыдан кейін Президент Трамп атысты тоқтату туралы келісімге қол жеткізілгенін және оған Иран мен Израильдің де келіскенін жариялады.
