ИЕРУСАЛИМ. 25 шілде. ИНТЕРФАКС – Израиль Президенті Ицхак Герцог Франция Президенті Эммануэль Макронның Палестина мемлекетін мойындау жөніндегі бастамасына қарсы пікір білдірді. Оның айтуынша, бұл қадам Таяу Шығыста бейбітшілік орнатуға ықпал етпейді.
«Франция Президентінің бастамасы аймаққа бейбітшілік әкелмейді. Бұл лаңкестік қатерін жоюға да, кепілге алынғандарды үйлеріне қайтаруға да көмектеспейді», – деп жазды Ицхак Герцог әлеуметтік желі X парақшасында.
Бұған дейін Эммануэль Макрон қыркүйек айында өтетін БҰҰ Бас Ассамблеясында Франция Палестинаны ресми түрде мемлекет ретінде мойындайтынын мәлімдеген болатын. Франция Президентінің пікірінше, бұл шешім – израильдіктер мен палестиналықтардың заңды мүдделерін қамтамасыз етудің жалғыз жолы және ол мүмкіндігінше қысқа мерзімде жүзеге асырылуы қажет.
Макронның бұл мәлімдемесін Израиль Премьер-министрі Биньямин Нетаньяху мен АҚШ Мемлекеттік хатшысы Марко Рубио да айыптады. Алайда, Франция бастамасына Испания, Сауд Арабиясы және Иордания қолдау білдірді.
