Астана. 3 маусым. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күні өткен жалпы отырыста «Техникалық және кәсіптік білім беру жүйесін, сондай-ақ халықтың көші-қон мәселелерін жетілдіру бойынша кейбір заңнамалық актілерге өзгерістер мен толықтырулар енгізу туралы» заңды екінші оқылымда қарап, қабылдады.
Мәжілістің заң жобасы жөніндегі қорытындысында атап өтілгендей, құжаттың негізгі ережелері техникалық және кәсіптік білім беру жүйесін, кәсіби біліктілік институтын жетілдіруге, сондай-ақ көші-қон саясатын реттеуге бағытталған.
Заңға сәйкес, Оқу-ағарту министрлігіне техникалық және кәсіптік білім беру ұйымдары үшін міндетті модульдерді әзірлеу және бекіту өкілеттігі беріледі. Сонымен қатар жұмыс берушілерді білім беру бағдарламаларын әзірлеу процесіне тарту көзделген.
Құжатта белсенді ұзақ өмір сүру орталықтарының қызметін ұйымдастыру тәртібі заңнамалық деңгейде айқындалады. Сондай-ақ салымшының өтініші негізінде зейнетақы жинақтарын инвестициялық портфельді басқарушы компаниялардың инвестициялық басқаруына беру жөніндегі нормалар енгізіледі.
Бұдан бөлек, мүгедектігі бар адамдарды жұмысқа орналастыру үшін бөлінетін жұмыс орындары квотасын белгілеу, мониторинг жүргізу және оның орындалуын бағалау қағидалары нақтыланады. Сонымен қатар субсидияланатын жұмыс орындарына қатысушылардың жалақысының субсидияланатын бөлігін еңбек мобильдігі орталықтары арқылы төлеу тетігі енгізіледі.
Түзетулердің жеке бір блогы көші-қон саясатына қатысты. Заңда еңбек ресурстары артық өңірлерден жұмыс күші тапшы өңірлерге азаматтарды ерікті түрде қоныс аудару тәртібін айқындау ұсынылады. Сонымен қатар еңбек делдалдығы саласындағы бақылауды күшейту көзделген.
Заң енді Парламент Сенатының қарауына жіберіледі.
