Астана. 3 маусым. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күні өткен жалпы отырыста «Топырақты қорғау туралы» заңды екінші оқылымда қарап, қабылдады.
Құжат еліміздің топырақ ресурстарын қорғаудың құқықтық негізін қалыптастыруға бағытталған. Бұл туралы отырыста Мәжіліс депутаты Нұржан Әшімбетов мәлімдеді.
Заңда «топырақ» ұғымын және оның негізгі көрсеткіштерін бекіту, топырақты ұтымды пайдалану мен қорғауға қойылатын негізгі талаптарды белгілеу, жергілікті мемлекеттік органдардың функцияларын нақтылау, ғылыми зерттеулердің басым бағыттарын айқындау және халықаралық ынтымақтастықты дамыту көзделген.
Ауыл шаруашылығы мақсатындағы жер учаскелерін беру кезінде олардың топырақ паспорты міндетті түрде әзірленетін болады. Құжатта топырақтың бонитет балы, қарашірік мөлшері, азот, фосфор және калий деңгейлері, тұздану дәрежесі, қышқылдық көрсеткіші және басқа да сипаттамалары көрсетіледі.
Заң топырақтың қасиеттерін қалпына келтіруге бағытталған міндетті шараларды енгізуді де қарастырады. Атап айтқанда, ауыл шаруашылығы жерлерінде ауыспалы егіс жүйесін енгізу, қар тоқтату және мульчалау әдістерін қолдану, сондай-ақ ғылыми негізделген жүйеге сәйкес органикалық және минералдық тыңайтқыштарды пайдалану талап етіледі.
Сонымен қатар топырақтың жай-күйіне қарай жекелеген ауыл шаруашылығы дақылдарын өсіруге шектеулер енгізіледі.
Бұдан бөлек, топырақты су басудан, батпақтанудан, қайталама тұзданудан, құнарсызданудан, құрғаудан және тығыздалудан қорғау талаптары бекітіледі. Сондай-ақ тозған және деградацияға ұшыраған жерлерді қалпына келтіру шаралары қарастырылған.
Мәжіліс сонымен бірге «Топырақты қорғау мәселелері бойынша кейбір заңнамалық актілерге өзгерістер енгізу туралы» ілеспе заңды да қабылдады.
Екі құжат та енді қарау үшін Парламент Сенатына жолданады.
