Астана. 17 маусым. ИНТЕРФАКС-ҚАЗАҚСТАН – Парламент Мәжілісі сәрсенбі күні өткен жалпы отырыста «Қазақстан Республикасы Үкіметі мен Өзбекстан Республикасы Үкіметі арасындағы трансшекаралық су нысандарын бірлесіп басқару және ұтымды пайдалану туралы келісімді ратификациялау туралы» заңды қабылдады.
Мәжілістің Аграрлық мәселелер комитетінің қорытындысында көрсетілгендей, келісімге 2025 жылы 15 қарашада қол қойылған. Құжаттың мақсаты – трансшекаралық су нысандарын бірлесіп басқару мен тиімді пайдалану, сондай-ақ мемлекетаралық маңызы бар су шаруашылығы құрылыстарының қауіпсіз жұмысын қамтамасыз ету.
Келісім аясында трансшекаралық су нысандарын және мемлекетаралық пайдаланудағы су шаруашылығы инфрақұрылымын бірлесіп басқару мәселелерімен айналысатын Қазақстан–Өзбекстан үкіметаралық комиссиясын құру көзделген.
Комитеттің қорытындысында атап өтілгендей, келісімді ратификациялау екі мемлекет арасындағы трансшекаралық су ресурстарын пайдалану саласындағы ұзақ мерзімді әрі өзара тиімді ынтымақтастықты нығайтуға мүмкіндік береді. Сонымен қатар су ресурстарын бөлуге байланысты туындауы мүмкін даулы жағдайлардың алдын алуға ықпал етеді.
Қабылданған заң Сенаттың қарауына жолданады.
