БЕРЛИН. 4 қазан. ИНТЕРФАКС – Германиядағы Мюнхен әуежайы сенбі таңертең дрондардың әуе кеңістігінде пайда болуына байланысты тоқтатылған рейстерден кейін қалыпты жұмыс тәртібіне қайта оралды. Бұл туралы Associated Press (AP)хабарлады.
Бұған дейін Мюнхен әуежайы 24 сағаттан аз уақыт ішінде екі рет ұшуларды қабылдау мен жіберуді тоқтатуға мәжбүр болды.
Алғашқы үзіліс бейсенбіге қараған түні орын алып, 3 мың жолаушыға әсер етті.
Екінші рет – жұмаға қараған түні – кемінде 6,5 мың адам рейстердің тоқтауынан зардап шекті.
Әуежай жергілікті уақыт бойынша таңғы 07:00-де (Астана уақытымен 10:00) біртіндеп қалыпты жұмыс режиміне орала бастады.
AP дерегінше, Германия билігі әзірге дрондармен байланысты оқиғаларға кім жауапты болуы мүмкін екені жөнінде ақпарат бермеді.
ФРГ ішкі істер министрі Александер Добриндт демалыс күндері Мюнхенде еуропалық әріптестерімен бірге бұл оқиғаларды, сондай-ақ дрондарды анықтау және олардан қорғану жоспарын талқылайтынын айтты.
Қыркүйек айының соңында Данияда да бірнеше рет әуежайлар дрондар ұшып өтуіне байланысты жұмысын уақытша тоқтатқан еді.
Дания қарулы күштері өз нысандарының үстінде белгісіз дрондардың байқалғанын хабарлаған.
Қыркүйек айында дрондар Осло әуежайының үстінен де көрінген.
Сонымен қатар, 3 қазанға қараған түні Бельгиядағы Эльзенборн әскери базасының маңында бірнеше дрон байқалғаны туралы қорғаныс министрі Тео Франкен растады, бірақ олардың шыққан жері әзірге белгісіз.
