АЛМАТЫ, 4 тамыз – ИНТЕРФАКС-ҚАЗАҚСТАН. Қазақстан үкіметі Орал қаласында магистралдық жылу желілерінің 3,9 шақырымдық бөлігін қайта жаңғыртуды аяқтауға 2,5 млрд теңге көлемінде қаражат бөлді, деп хабарлады Үкіметтің баспасөз қызметі.
«Мемлекет басшысы Қасым-Жомарт Тоқаевтың елді үздіксіз жылумен қамтамасыз ету жөніндегі тапсырмаларын іске асыру аясында инфрақұрылымды жүйелі жаңғырту жұмыстары жүргізілуде. Осы мақсатта Үкімет резервінен Батыс Қазақстан облысы Орал қаласындағы 3,9 км магистралдық жылу желілерін реконструкциялауды аяқтауға шамамен 2,5 млрд теңге бөлінді», – делінген хабарламада.
Тиісті қаулыға Премьер-Министр Олжас Бектенов қол қойды.
Үкіметтің мәліметінше, жобаны іске асыру нәтижесінде жылу желілерінің тозуы азайып, ыстық суды жеткізу қуаты артады және пайдалану шығындары қысқарады.
Реконструкция жұмыстары 2025–2026 жылдардағы жылыту маусымы басталғанға дейін аяқталады деп жоспарланған.
Жобалық-сметалық құжаттарға сәйкес, №2 жылу магистралін – жылу электр орталығының коллекторынан бастап «Сити Центр» сауда үйі маңындағы төменге түсетін құбырға дейінгі бөлігін қайта құру жұмыстары 2024 жылы басталған. Бұл желі алғаш рет 1987 жылы пайдалануға берілген. Осы уақыт аралығында темірбетон конструкциялар мен жабу арматуралары айтарлықтай тозғаны атап өтіледі.
Орал қаласындағы магистралдық жылу желілерінің жалпы ұзындығы – 249 км. Олардың басым бөлігі 1970–1980 жылдары пайдалануға берілген. Қазіргі таңда желілердің тозу деңгейі 50%-ды құрайды.
2024 жылғы 4 тамыздағы ресми бағам бойынша 1 АҚШ доллары – 543,24 теңге.
