Берлин. 31 қазан. ИНТЕРФАКС – Польша президенті Кароль Навроцкий елдің Конституциялық соты басшылығына қатысты туындаған дағдарысқа байланысты Сенегалға сапарын тоқтататынын мәлімдеді.
«Мұндай жағдайда президент Польшада болуы тиіс. Сондықтан Сенегалға сапарымды тоқтатып, еліме қайтып барамын», – деп жазды ол әлеуметтік желіде.
Жұма күні кешке Варшавадағы Конституциялық сот ғимаратына қоғамдық тәртіпті қалпына келтіру және наразылық акциясына қатысушылардың сот аумағына кіруіне жол бермеу үшін полиция қызметкерлері келді. EFE агенттігінің хабарлауынша, полиция үш адамды ұстаған.
Польшадағы негізгі саяси күштер Конституциялық сот құрамына кімдер енуі керектігі жөнінде ұзақ уақыттан бері келісе алмай келеді.
«Азаматтық платформа» партиясының өкілі, Польша премьер-министрі Дональд Туск бұрынғы үкімет тағайындаған судьяларды жаңаларымен алмастыруға ұмтылып отыр.
Тусктың саяси қарсыласы Навроцкий биыл парламент ұсынған алты судьяның тағайындалуын бекітуден бас тартқан болатын. Конституциялық сот төрағасы Богдан Свенчковский де жаңа судьялардың қызметіне кірісуіне рұқсат бермеді. Свенчковский де, Навроцкий де қазір оппозицияда отырған «Құқық және әділет» партиясын қолдайды.
Жұма күні Свенчковскийдің қызметіне қатысты бір-біріне қайшы ақпарат тарады. Кейбір мәліметтер бойынша, ол уақытша қызметінен шеттетіліп, сот басшылығын Тускты қолдайтын судья Анна Корвин-Петровская өз қолына алған. Алайда EFE агенттігінің атап өтуінше, Конституциялық сот өкілдері мұндай жағдайдың болмағанын мәлімдеген.
Сот басшылығын ауыстыру әрекеттері «Құқық және әділет» партиясының қарсылығын туғызды. Атап айтқанда, партия жетекшісі Ярослав Качиньский Тусктың әрекетін елдің сот билігіне қарсы бағытталған мемлекеттік төңкеріс жасау әрекеті деп атады.
