Астана. 27 сәуір. ИНТЕРФАКС-ҚАЗАҚСТАН – Қазақстанның сыртқы істер министрі Ермек Көшербаев БАӘ президентіне 28–29 мамырда Астанада өтетін Еуразиялық экономикалық форумға қатысуға шақыруды табыстады. Бұл туралы Қазақстан СІМ баспасөз қызметі хабарлады.
Шақыруды министр Қазақстан Президенті Қасым-Жомарт Тоқаев атынан БАӘ-ге ресми сапары барысында осы елдің вице-премьері – сыртқы істер министрі Абдалла бен Заид Аль Нахаянмен кездесуде жеткізді.
Кездесу барысында тараптар өңірлік және халықаралық күн тәртібіндегі өзекті мәселелер бойынша пікір алмасты. Көшербаев қазіргі өңірлік жағдай аясында Қазақстанның БАӘ-мен ынтымақтастығы мен қолдауын растады. Ол шиеленістің ушығуына жол бермеудің және барлық қақтығыстарды халықаралық құқық қағидаттары негізінде саяси-дипломатиялық жолмен реттеудің маңызын атап өтті.
Өз кезегінде шейх Аль Нахаян көрсетілген қолдау үшін алғыс білдіріп, дипломатиялық күш-жігерді ілгерілетуге бағытталған Қазақстанның сындарлы ұстанымын жоғары бағалады.
Келіссөздер қорытындысы бойынша тараптар стратегиялық әріптестікті одан әрі тереңдетуге, практикалық өзара іс-қимылды кеңейтуге және екіжақты әрі көпжақты форматтарда тығыз үйлестіруді жалғастыруға өзара мүдделілік танытатынын растады.
