Астана. 23 шілде. ИНТЕРФАКС-ҚАЗАҚСТАН – Мемлекет басшысыҚасым-Жомарт Тоқаев медицина қызметкерлеріне күш қолдану және оларға қатыгездік таныту жағдайлары бойынша қылмыстық жазаны күшейтуге бағытталған заңнамалық түзетулер әзірлеуді үкіметке тапсырды. Бұл туралы Ақорданың баспасөз қызметі хабарлады.
«Президент парламент депутаттарының, медициналық қауымдастық пен белсенді азаматтардың ұлттық заңнамаға өзгерістер енгізу туралы ұсыныстарын қолдайды. Бұл өзгерістер медицина қызметкерлерінефизикалық күш көрсету және оларға қатыгездік таныту әрекеттері үшін жауапкершілікті күшейтуді көздейді», – делінген сәрсенбі күні таратылғанресми ақпаратта.
Мемлекет басшысының пікірінше, мұндай оқиғалар дәрігерлердің денсаулығына және өміріне елеулі зиян келтіреді, сондықтан олар «Закон и Порядок» қағидаты аясында құқықтық жолмен қатаң түрде тоқтатылуы тиіс.
Осыған байланысты президент үкіметке азаматтық қоғам өкілдерінің қатысуымен парламентте талқыланатын тиісті заңнамалық түзетулер жобасын дайындауды тапсырды.
Соңғы бір апта ішінде елімізде медицина қызметкерлеріне жасалған бірнеше шабуыл тіркелді.
Атап айтқанда, 16 шілде күні Қарағандыдағы жеке медициналық клиникада ер адам әйелімен және баласымен бірге келген. Ол қызметтік бөлмеге баса-көктеп кіріп, медбикеге шабуыл жасаған. Нәтижесінде медицина қызметкері ми шайқалуына, дене жарақаттарына және екі саусағының сынуына ұшырады.
Ал 17 шілде күні Қостанай облыстық ауруханасының қабылдау бөлімінде хирург Антон Кистанов науқастың соққысына тап болып, есінен таныпқалған. Дәрігер ауыр хәлде ауруханаға жеткізілді. Оған бас сүйек-ми жарақаты, субдуралды гематома және шүйде сүйегінің сынуы диагнозы қойылды. 34 жастағы күдікті ұсталып, екі айға қамауға алынды.
Аталған оқиғалар қоғамда кең резонанс туғызып отыр.
