ВАШИНГТОН. 23 шілде. ИНТЕРФАКС-ҚАЗАҚСТАН – АҚШ пен Жапония жаңа экономикалық келісімге келді. Бұл жөнінде Америка Президенті Дональд Трамп The Truth Social желісіндегі жазбасында хабарлады.
Оның айтуынша, Токио америкалық экономикаға 550 миллиард доллар көлемінде қаржы құюға келіскен. «Бұл – ауқымды келісім. Инвестициядан түсетін табыстың 90 пайызы АҚШ-қа тиесілі болады», – деп жазды Трамп.
Келісім аясында АҚШ Жапонияға көлік құралдарын, күріш және ауыл шаруашылығы өнімдерін жеткізуді бастайды. Сонымен қатар, Токио Америка нарығына өз тауарларын 15 пайыздық баж салығымен енгізетін болады.
Бұл ақпаратты Жапония тарапы да растады. Ел премьер-министрі кеңсесінің жоғары лауазымды өкілі NHK телеарнасына берген сұхбатында келісімді«ұзақ әрі күрделі келіссөздердің нәтижесі» деп атады.
«Президент Трамптың жариялаған ақпараты шындыққа сәйкес келеді. Бұл – экономиканы қалпына келтіру жөніндегі министр Рёсэй Акадзаваның қажырлы еңбегінің нәтижесі», – деді шенеунік.
Айта кетейік, бұған дейін Дональд Трамп 2025 жылдың 1 тамызынан бастап Жапониядан әкелінетін барлық тауарларға 25 пайыз көлемінде кедендік тариф енгізілетінін мәлімдеген.
