Астана. 30 сәуір. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Жапония парламенттік достық лигасының төрағасы Ясутоси Нисимурамен кездесіп, мемлекетаралық ынтымақтастықты тереңдету және парламентаралық байланыстарды нығайту мәселелерін талқылады, деп хабарлады Ақорданың баспасөз қызметі.
Тоқаев Жапонияның Азиядағы Қазақстанның негізгі серіктестерінің бірі екенін атап өтіп, өткен жылы Токиода өткен ресми сапары барысында қол жеткізілген келісімдерді іске асыруға, сондай-ақ сауда-экономикалық және инвестициялық ынтымақтастықты кеңейту әлеуетіне назар аударды.
«Біз Токио қаласымен кеңейтілген стратегиялық әріптестікті тереңдетуге айрықша мән береміз. (…) Токиода біз “Орталық Азия – Жапония” диалогының алғашқы саммитін табысты өткіздік. Бұл ауқымды кездесу өңіраралық байланыстарды нығайтуға ықпал етті», – деді мемлекет басшысы.
Президенттің айтуынша, Орталық Азия мен Жапония көшбасшыларының келесі саммиті 2027 жылы Астанада өтеді. Қазіргі уақытта бұл іс-шараға дайындық жұмыстары басталған.
Кездесу барысында тараптар мәдени-гуманитарлық байланыстарды да талқылады. Тоқаев Жапония мәдениетіне және сумо, дзюдо сияқты дәстүрлі спорт түрлеріне қызығушылықтың артып келе жатқанын атап өтіп, қазақстандық сумошы Ерсін Балтағұлдың (Кимбозан Харуки) жетістіктерін ерекше атады.
Нисимура кездесу мүмкіндігі үшін алғыс білдіріп, Жапония парламентінің Қазақстанмен жан-жақты ынтымақтастықты кеңейтуге дайын екенін растады.
