Астана. 7 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев қазақстандықтарды 7 мамыр – Отан қорғаушылар күнімен құттықтады.
«Бұл мерекенің мемлекеттік әрі қоғамдық маңызы ерекше. Ол жауынгерлеріміздің ерлігі, рухының мықтылығы мен жанқиярлығын айшықтайды. Бұл күн Отан игілігі үшін қызмет етіп жүрген және қызмет еткен, елдің тыныштығы, аумақтық тұтастығы, тұрақтылығы мен қауіпсіздігін қорғап жүрген барша азаматтарды біріктіреді», – делінген Президент құттықтауында.
Мемлекет басшысы қазақстандық сарбаздар мен командирлердің батыр бабалардың даңқты дәстүрін жалғастырып, шынайы патриотизмнің үлгісін көрсетіп жүргенін атап өтті.
Бітімгерлік миссиялар, арнайы оқу-жаттығулар мен халықаралық жарыстар барысында сарбаздар мен офицерлер, сондай-ақ елдің барлық күштік құрылымдарының қызметкерлері кәсібилік, тәртіп және жауынгерлік дайындықтың жоғары деңгейін көрсетіп келеді.
«Мемлекет қорғаныс қабілетін арттыруға және әскери қызметкерлерді жан-жақты қолдауға әрдайым баса мән береді. Жаңа Конституцияда “Қазақстан Республикасын қорғау – оның әрбір азаматының қасиетті парызы және міндеті” деп нақты жазылған. Бұл сөздерде ел мен халықтың ажырамас байланысы, әр азаматтың Отан тағдыры алдындағы жауапкершілігі жатыр», – деді Президент.
«Отанға адал қызмет ету идеалдары мен прогрессивті конституциялық құндылықтарға сүйене отырып, біз мемлекеттілігімізді нығайтып, Әділетті, Қуатты әрі Қауіпсіз Қазақстан құру жолындағы биік мақсаттарға жетеміз деп сенемін. Отан қорғаушыларына табандылығы, үлгілі қызметі және антқа адалдығы үшін алғысымды білдіремін!» – делінген құттықтауда.
