Астана. 15 шілде. ИНТЕРФАКС-ҚАЗАҚСТАН – Қазақстан премьер-министрі Олжас Бектенов жаңа Салық кодексінің нормалары енгізілген жағдайда тұрғын үй бағасының күрт өсуі болмайды деп есептейді. Егер нарықта алыпсатарлық немесе құрылыс компаниялары арасында сөз байласу байқалса, үкімет бұл жағдайға араласуға дайын.
«Тұрғын үй нарығында қандай да бір күрделі проблема болады деп ойламаймын. (…) Жаңа Салық кодексінің нормалары келесі жылы күшіне енген кезде тұрғын үй бағасының күрт көтерілуі болмайды деп есептейміз. Нарықтағы алыпсатарлық жолмен немесе келісіп көтерілген бағаларға жол берілмейді. Ондай жағдайларда бізде заң аясында тиісті шараларды қабылдап, жағдайға араласуға толық мүмкіндік бар», – деді Бектенов сейсенбі күні Астанада өткен брифингте.
Премьер-министр құрылыс саласына қатысты салықтық өзгерістерге бірқатар жеңілдік қарастырылғанын атап өтті.
«Біріншіден, бұл өзгерістерде олардың әсерін жұмсартатын нақты ескертпелер бар. Екіншіден, бұл қадамдар талдауға негізделген. Біз құрылыс компанияларының баға белгілеуін қарап шықтық, олар қосылған құн салығынан босатылғанына қарамастан, бұл артықшылықтарды ескерместен, артық табыс тауып отырған», – деді ол.
Сонымен қатар Бектенов соңғы жылдары елде тұрғын үй құрылысы жоғары қарқынмен жүргізіліп жатқанын айтты. «Өткен жылы 18,9 млн шаршы метр тұрғын үй пайдалануға берілді. Биыл бұл көрсеткіш 19 млн шаршы метрден асады. Бұл – айтарлықтай жоғары қарқын», – деп түйіндеді үкімет басшысы.
