Астана. 15 сәуір. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күні пленарлық отырыста «Ғылым мәселелері бойынша кейбір заңнамалық актілерге өзгерістер мен толықтырулар енгізу туралы» заңды екінші оқылымда қарап, қабылдады.
Депутаттар бастамашы болған заң жобасы ғылым және ғылыми-техникалық қызмет саласындағы қоғамдық қатынастарды құқықтық реттеуді жетілдіруге бағытталған. Бұл туралы мәжіліс депутаты Асхат Аймағамбетов хабарлады.
Құжатта ғалымдар мен ғылыми қызметкерлердің мәртебесі айқындалып, олардың құқықтары мен бостандықтарын қорғау, академиялық еркіндік пен шығармашылық еркіндікке кепілдіктер қарастырылған.
Заң аясында Азаматтық, Қылмыстық-атқару, Еңбек, Әлеуметтік, Бюджет кодекстеріне, сондай-ақ «Халық денсаулығы және денсаулық сақтау жүйесі туралы» кодекске және бірқатар заңдарға түзетулер енгізіледі.
Атап айтқанда, денсаулық сақтау саласында жоғары технологиялық медициналық көмектің бірыңғай стандарттарын қамтамасыз ететін, диагностиканың дәлдігін арттыратын және әдістемелік қолдау көрсететін референс-орталықтар құру көзделген.
Сонымен қатар дәрілік заттарды тіркеу және қайта тіркеу тәртібі оңтайландырылып, бұл қызмет кешенді мемлекеттік қызмет форматына көшіріледі. Бұл қажетті дәрі-дәрмектер мен медициналық бұйымдардың ішкі нарыққа шығуын жеделдетуге мүмкіндік береді.
«Дәрілік заттарды тіркеу мерзімі едәуір қысқарады. Қазіргі таңда заң бойынша бұл рәсім 210 күнге дейін созылады, алайда іс жүзінде бұдан да ұзаққа созылуы мүмкін. Ұсынылған шаралар бұл мерзімді 100 күнге дейін қысқартуға мүмкіндік береді», – деді Аймағамбетов.
Сондай-ақ дәрілік препараттардың сапасына бақылау күшейтіледі.
Ғылыми зерттеулер саласында да бірқатар өзгерістер қарастырылған. Атап айтқанда, ғылыми жобалар бойынша конкурс нәтижелерін жариялау мерзімдері заңмен нақты белгіленеді. Қазіргі кезде бұл мерзімдер реттелмегендіктен, рәсімдер созылып, ғалымдар белгісіздік жағдайында қалып отыр.
Құжатта ғылыми қызметкерлердің еңбек құқықтарының теңдігі қамтамасыз етіледі. Мемлекеттік тапсырыс аясында жұмыс істейтін барлық ғылыми қызметкерлерге, оның ішінде жеке ұйымдар қызметкерлеріне де 56 күндік ақылы демалыс беру қарастырылған.
Заң Сенаттың қарауына жолданды.
