Астана. 11 желтоқсан. ИНТЕРФАКС-ҚАЗАҚСТАН – Қазақстан Республикасының Индустрия және құрылыс министрлігі, мемлекеттік Alatau City Authority қоры және Кореяның Шетелдік инфрақұрылымды дамыту жөніндегі ұлттық корпорациясы (KIND) Alatau Smart City жобасын дамыту бойынша өзара түсіністік пен ынтымақтастық туралы меморандумға қол қойды, деп хабарлады Үкімет баспасөз қызметі.
Аталған құжат Қазақстан Премьер-министрінің орынбасары Қанат Бозымбаев пен Кореяның шетелдік инфрақұрылым және қалалық даму жөніндегі ұлттық корпорациясының президенті әрі бас директоры Ким Бок-хванмен Астанада өткізген кездесу аясында рәсімделді. Бұл кездесу қазан айында Сеулде өткен Alatau Rise with Kazakhstan роуд-шоуының жалғасы болды. Іс-шара барысында қазақстандық тарап Алатау смарт-қаласын елдің стратегиялық маңызды жобаларының бірі ретінде таныстырған болатын.
«Көптеген оңтүстіккореялық компаниялар біздің болашағы зор Alatau Smart City жобамызды қолдап отыр, бұл біз үшін өте құптарлық жайт. KIND корпорациясы инфрақұрылым саласындағы жобаларға, оның ішінде энергетика, сумен жабдықтау, су тазарту, ағынды суларды өңдеу және кәріз жүйесі, қатты тұрмыстық қалдықтарды қайта өңдеу бағыттарында EPC-келісімшарт форматында қатыса алады», – деді Бозымбаев.
Кездесу барысында тараптар логистика мен порт инфрақұрылымы саласындағы өзге де ықтимал жобалар бойынша бірлескен жұмыс жүргізу перспективаларын талқылады. Серіктестік үшін мүмкіндіктер кең екенін ескере отырып, вице-премьер KIND басшылығына Қазақстанда корпорацияның өкілдігін ашуды ұсынды.
Алатау қаласы Алматы облысында 2024 жылғы қаңтарда Мемлекет басшысының Жарлығымен құрылған. Қаланың бас жоспары сингапурлық Surbana Jurong компаниясымен бірлесіп әзірленген. 2025 жылғы қыркүйекте Президент Алатауға арнайы мәртебе беру туралы Жарлыққа қол қойды. Жоспарға сәйкес, Alatau City өңірдегі алғашқы толық цифрландырылған қалаға айналмақ: смарт-сити технологияларын енгізуден бастап, тауарлар мен қызметтерге криптовалюта арқылы төлем жасау мүмкіндігіне дейінгі шешімдер қамтылады.
