Астана. 30 қазан. ИНТЕРФАКС-ҚАЗАҚСТАН – Қазақстан мен Қырғызстан премьер-министрлерінің қатысуымен Бішкекте өткен екінші өңіраралық ынтымақтастық форумы аясында екі ел сауда-экономикалық саланы қамтитын бірқатар құжат пен келісімге қол қойды, деп хабарлады Қазақстан үкіметінің баспасөз қызметі.
Атап айтқанда, Алматы мен Бішкек арасындағы бауырлас қалалар байланысын 2026–2030 жылдары дамыту, Түркістан мен Манас қалалары, сондай-ақ Щучинск-Бурабай курорттық аймағы мен Ыстықкөл курорттық аймағы арасында бауырластық қатынастар орнату жөніндегі құжаттарға қол қойылды.
Бірқатар келісім Қырғызстанның Ыстықкөл, Жалал-Абад және Нарын облыстарымен ынтымақтастықты кеңейтуге бағытталған.
Сонымен қатар сауда, экспорт және қазақстандық өнімдерді Қырғызстан нарығында ілгерілету салаларында бірнеше коммерциялық құжатқа қол қойылды.
Хабарламаға сәйкес, 2025 жылдың қорытындысы бойынша Қазақстан мен Қырғызстан арасындағы өзара сауда көлемі 33%-ға өсіп, 2,4 млрд долларға жетті. Биылғы жылдың басынан бері бұл көрсеткіш өткен жылдың сәйкес кезеңімен салыстырғанда тағы 20%-ға артты.
Бұған дейін екі елдің басшылары өзара тауар айналымын 3 млрд долларға жеткізу міндетін қойған болатын.
Экономикалық байланыстарды одан әрі дамытуда шекаралас өңірлерге маңызды рөл беріліп отырғаны атап өтілді. Қазақстанның Алматы және Жамбыл облыстары Қырғызстанның Ыстықкөл, Талас және Шу облыстарымен шектеседі. Екі ел арасындағы мемлекеттік шекараның ұзындығы шамамен 1,2 мың шақырымды құрайды. Шекара маңындағы сауда мен логистиканың негізгі орталықтарының бірі ретінде Жамбыл облысын дамытуға ерекше көңіл бөлінген. Қазақстан мен Қырғызстан шекарасындағы сегіз өткізу пунктінің жетеуі осы облыста орналасқан. Сондай-ақ өңірде қырғыз капиталының қатысуымен құрылған мыңнан астам кәсіпорын жұмыс істейді. Бұдан бөлек, Жамбыл облысында жүзеге асырылып жатқан Индустриялық сауда-логистикалық кешен екі елдің болашағы зор бірлескен жобаларының бірі саналады.
Қазақстан мен Қырғызстан арасындағы теміржол тасымалына қатысты мәліметтер де келтірілді. 2025 жылы теміржол арқылы жүк тасымалдау көлемі 10%-ға өсіп, 6,8 млн тоннаға жетті. Ал 2026 жылдың тоғыз айында 5,1 млн тонна жүк тасымалданды. Бұл өткен жылдың сәйкес кезеңіндегі көрсеткіштен 8,3%-ға жоғары.
Автомобиль көлігімен жүк тасымалдау саласында да өсім сақталып отыр. Өткен жылдың қорытындысы бойынша тасымал көлемі 37%-ға артып, 3,7 млн тоннаны құрады. Көлік тасымалына қатысты рәсімдерді жеңілдетудегі маңызды қадамдардың бірі рұқсат құжаттарын электронды түрде алмасуға көшу болды.
Тараптар туризм саласындағы әлеуеттің де жоғары екенін атап өтті. Қазақстан мен Қырғызстанның тау, экологиялық, жағажай және іскерлік туризм бағыттарында бірлескен туристік маршруттарды дамытуға мүмкіндігі мол. Биылғы тоғыз айда екі ел арасындағы өзара туристік ағын 4 млн адамнан асты.
Тараптар өңірлер арасындағы тікелей байланыстарды одан әрі кеңейтуге, бірлескен өндірістерді, сауданы, көлік инфрақұрылымы мен туризмді дамытуға мүдделі екенін растады. Жоспарланған бастамаларды жүзеге асыру қазақ-қырғыз стратегиялық серіктестігін нығайтып, өңірдің тұрақты экономикалық дамуына ықпал етпек.
