Астана. 16 сәуір. ИНТЕРФАКС-ҚАЗАҚСТАН – Қазақстан Парламентінің Сенаты бейсенбі күні өткен пленарлық отырыста Қазақстан Республикасы мен Тәжікстан Республикасы арасындағы одақтастық қатынастар туралы шартты ратификациялау туралы заңды мақұлдады.
Құжат бұған дейін Мәжілісте қабылданған болатын. Осылайша, заң Парламент тарапынан толық қабылданып, Президенттің қол қоюына жолданады.
Қазақстан мен Тәжікстан арасындағы одақтастық қатынастар туралы шарт 2024 жылғы 22 тамызда Душанбе қаласында қол қойылған. Сенаттың халықаралық қатынастар, қорғаныс және қауіпсіздік комитетінің қорытындысына сәйкес, бұл құжат екі ел арасындағы жан-жақты ынтымақтастықты дамытуға қосымша серпін беруге бағытталған.
Шартта саяси, әскери, сауда-экономикалық, ауыл шаруашылығы, көлік-транзит, азық-түлік, өнеркәсіп, су-энергетика, экология, цифрландыру, білім беру, мәдени-гуманитарлық салалардағы және өңіраралық интеграциядағы ынтымақтастықты кеңейту көзделген.
Құжат нормаларына сәйкес, тараптар өңірлік қауіпсіздікті қамтамасыз ету мақсатында Орталық Азиядағы қауіп-қатерлер мен сын-тегеуріндерге қарсы іс-қимыл бойынша өзара ықпалдастықты күшейтеді. Сондай-ақ әскери және әскери-техникалық ынтымақтастық, оның ішінде бірлескен оқу-жаттығулар өткізу, кадрлар мен мамандардың әлеуетін арттыру қарастырылған.
Сауда-экономикалық өзара іс-қимылға ерекше назар аударылып, кәсіпкерлік қызметті дамытуға қолайлы жағдай жасау көзделеді.
Сонымен қатар Орталық Азиядағы трансшекаралық су ресурстарын тиімді әрі өзара тиімді пайдалану және қорғау бағытындағы ынтымақтастықты дамыту маңызды бағыттардың бірі ретінде белгіленген.
Бұдан бөлек, құжат Қазақстан мен Тәжікстан арасындағы парламентаралық байланыстарды, оның ішінде достық топтары аясындағы өзара іс-қимылды нығайтуға ықпал етеді.
