Астана. 30 желтоқсан. ИНТЕРФАКС-ҚАЗАҚСТАН — 2025 жылы Қазақстан Президенті Қасым-Жомарт Тоқаевтың ішкі және сыртқы саяси қызметінің күн тәртібі өте қарқынды әрі нәтижелі болды. Бұл туралы Мемлекет басшысының баспасөз хатшысы Руслан Желдібай мәлімдеді.
Оның айтуынша, бір жыл ішінде Президент 23 шетелдік сапар жасаған. Олардың ішінде екі мемлекеттік сапар — Ресей мен Өзбекстанға, бес ресми сапар — Қытай Халық Республикасына, Иорданияға, Түркияға, Қырғызстанға және Жапонияға, сондай-ақ 16 жұмыс сапары болған. Жұмыс сапарлары аясында Мемлекет басшысы Ресейге (екі рет), АҚШ-қа (екі рет), Түрікменстанға (екі рет), Біріккен Араб Әмірліктеріне, Өзбекстанға, Әзербайжанға, Тәжікстанға және Қырғызстанға барған.
Руслан Желдібайдың атап өтуінше, сапарлар барысында сауда-экономикалық, көлік-логистикалық және инвестициялық ынтымақтастықты нығайтуға ерекше назар аударылған. Жалпы халықаралық кездесулердің қорытындысы бойынша құны 70 миллиард АҚШ долларынан асатын коммерциялық келісімдерге қол қойылған.
Баспасөз хатшысының мәліметінше, 2025 жылы Президент шетелдік мемлекеттер үкіметтерінің басшыларымен және өзге де жоғары лауазымды тұлғаларымен, халықаралық ұйымдардың жетекшілерімен, іскерлік және сараптамалық қауымдастық өкілдерімен барлығы 186 кездесу өткізген.
Сонымен қатар Қазақстан халықаралық диалог үшін белсенді алаңға айналды. 2025 жылы елімізге шет мемлекеттердің басшылары мен үкімет жетекшілері 30 сапармен келген. Олардың қатарында Қытай Халық Республикасы, Италия (екі рет), Грузия, Өзбекстан, Словения, Вьетнам, Біріккен Араб Әмірліктері, Руанда, Солтүстік Македония, Болгария, Словакия, Иордания, Конго Демократиялық Республикасы, Мьянма, Венгрия, Әзербайжан, Финляндия, Эстония, Армения, Түрікменстан, Швейцария және Иран бар.
Бұдан бөлек, Мемлекет басшысы шетелдік мемлекеттер басшыларымен 43 телефон арқылы сөйлескен. Сондай-ақ төрт ресми рәсім барысында Президент 30 шет мемлекеттің елшісінен сенім грамоталарын қабылдаған.
2025 жылы Қасым-Жомарт Тоқаев Қазақстанның тоғыз өңіріне жұмыс сапарымен барып, 50-ден астам өндірістік, ғылыми және әлеуметтік-мәдени нысанды аралаған.
Руслан Желдібайдың айтуынша, бір жыл ішінде Президенттің ел ішіндегі және шетелдегі сапарлары барысында жүріп өткен жалпы қашықтығы 168 960 шақырымды құраған. Ұшақта өткізілген уақыт — 252 сағат.
