Астана. 20 ақпан. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев Вашингтонда америкалық ірі компаниялардың басшыларымен бірқатар кездесу өткізді, деп хабарлады мемлекет басшысының баспасөз қызметі.
U.S. International Development Finance Corporation (DFC) атқарушы директоры Бен Блэкпен кездесуде инвестициялық ынтымақтастықты кеңейту және бірлескен жобаларды іске асыру туралы талқылап, экономиканың түрлі секторларында өзара іс-қимылды тереңдетуге дайын екенін айтты.
Өз кезегінде Блэк АҚШ президенті Дональд Трамп пен оның әкімшілігі Қазақстанмен тығыз әрі өзара тиімді ынтымақтастықты нығайтуға басымдық беретінін атап өтті. Осы тұрғыда ол тау-кен өнеркәсібі, сондай-ақ көлік-транзиттік инфрақұрылым салаларындағы бірлескен жобаларды жүзеге асыру перспективаларын ерекше атап өтіп, олардың өңірлік және өңіраралық сауданы кеңейту үшін стратегиялық маңызға ие екенін айтты.
АҚШ-қа жұмыс сапары аясында Тоқаев трансұлттық Boeing корпорациясының атқарушы вице-президенті Джефф Шоккимен де кездесті. Кездесу барысында мемлекет басшысы Air Astana, SCAT және Vietjet Qazaqstan әуе тасымалдаушылары республиканың авиация саласын дамыту үшін маңызды мәнге ие бірлескен жобаларды одан әрі ілгерілетуге мүдделі екенін атап өтті.
«Осы контексте Қасым-Жомарт Тоқаев Air Astana мен Boeing арасында әуе кемелерін жеткізу туралы келісімге қол жеткізілгенін құптады. АҚШ-пен тікелей әуе қатынасын іске қосу мақсатында биылғы жылдың екінші жартысында Қазақстанға Boeing 787 Dreamliner үлгісіндегі ұшақтардың жеткізілуі күтіледі. Бұдан бөлек, SCAT әуе компаниясы қосымша Boeing ұшақтарын сатып алуды жоспарлап отыр, сондай-ақ америкалық корпорациямен әріптестікте Шымкент әуежайы базасында алғашқы техникалық қызмет көрсету және жөндеу орталығын ашу мүмкіндігін қарастыруда», — делінген хабарламада.
Өз кезегінде Шокки компанияның цифрландыру жөніндегі жоспарларымен бөлісіп, Қазақстанның транзиттік-көлік әлеуетіне жоғары баға берді. Ол жүк әуе тасымалдары секторында нәтижелі ынтымақтастық үшін елеулі әлеует бар екенін атап өтті. Кездесу барысында авиация саласы үшін отандық мамандарды даярлау мәселелері және Қазақстандағы жүк ұшақтары паркін дамыту перспективалары да талқыланды.
Тоқаев пен халықаралық инвестициялық Ashmore Group компаниясының басшысы Марк Кумбспен өткен кездесуде өзара тиімді бірлескен жобаларды іске асыру мәселелері қаралды.
Кумбс Қазақстан экономикасының стратегиялық секторларында ынтымақтастықты дамыту үшін елеулі әлеует бар екенін атап өтті. Сондай-ақ ол экономиканың басым және жоғары технологиялық салаларын дамытуға бағытталған Ашық инвестициялық әріптестік бағдарламасы аясындағы өзара іс-қимыл перспективалары туралы айтты.
Сонымен қатар Тоқаев Mars компаниясының бас атқарушы директоры Пол Вайраухты қабылдады. Мемлекет басшысы Қазақстанның Ауыл шаруашылығы министрлігі мен Mars компаниясы арасында шамамен 180 млн АҚШ доллары сомасына инвестициялық келісімге қол қойылуын құптады. Президент бұл оқиға стратегиялық маңызы бар әріптестіктің басталуын білдіретінін және қазақстан-америкалық ынтымақтастықтың жоғары деңгейін көрсететінін атап өтті.
Жоба аясында Mars компаниясы Алатау қаласында үй жануарларына арналған жем өндіретін зауыт салуды жоспарлап отыр. Бұл агроөнеркәсіптік шикізатты терең өңдеуді қамтамасыз етіп, жоғары қосылған құны бар өнім өндіруге мүмкіндік береді.
Өз кезегінде Вайраух өзара тиімді инвестициялық келісімді іске асыруға қолдау көрсеткені үшін Тоқаевқа алғыс білдірді. Компания басшысының айтуынша, бұл бастама Mars үшін Орталық Азияда және көршілес өңірлерде өндірісті және өткізу нарықтарын кеңейтуге тиімді алаң болмақ.
