Астана. 7 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Түркі мемлекеттері ұйымына (ТМҰ) мүше елдерге Өнеркәсіптік кооперация бағдарламасын қабылдап, басым жобаларды нақты айқындау қажеттігін айтты. Бұл туралы Мемлекет басшысының баспасөз қызметі хабарлады.
«Экономикамызды әртараптандыру ісінде өнеркәсіп саласындағы ынтымақтастық маңызды рөл атқарады. Осы тұрғыда Түркі мемлекеттері сауда-өнеркәсіп палатасының әлеуеті зор деп есептейміз. Айта кетерлігі, 2026 жылы Қазақстан бұл ұйымға төрағалық ететін болады. Осыған байланысты біз нақты басым жобалар көрсетілген Өнеркәсіптік кооперация бағдарламасын қабылдауды ұсынамыз», – деді Тоқаев Габалада өткен ТМҰ-ның XII саммитінде.
Президент өз сөзінде «Түркі әлемінің келешегі – 2040» бағдарламасын толыққанды жүзеге асырудың маңыздылығын атап өтті. Оның айтуынша, экономикалық ынтымақтастық – тұрақтылық пен өркендеудің берік негізі.
«Бүгінгі саммиттің мазмұны осы құжатты нақты іс-шаралармен толықтыруы тиіс. Әрине, ТМҰ-ға мүше мемлекеттердің әрқайсысының өзіндік артықшылықтары мен жетістіктері бар. Соған қарамастан, Ұйым аясында ауқымды сауда-экономикалық жобаларды іске асырудың нақты тетіктері ұсынылуда», – деді Тоқаев.
Мемлекет басшысы бұл бағыттағы маңызды құралдардың бірі ретінде Түркі инвестициялық қорын атады және оның мүмкіндіктерін барынша тиімді пайдалануға шақырды.
«Биыл Түркістан қаласында түркі мемлекеттерінің экономика және сауда министрлерінің кездесуі өтеді. Осы шара аясында Қор қаржыландыратын жобалардың тізімін жасау орынды деп есептеймін», – деді Қазақстан Президенті.
