Астана. 7 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Түркі мемлекеттері ұйымы (ТМҰ) аясында киберқауіпсіздік жөніндегі кеңес құруды ұсынды, деп хабарлайды Мемлекет басшысының баспасөз қызметі.
«Түркі мемлекеттері қауіпсіздікті нығайту және терроризм сияқты түрлі сын-қатерлерге қарсы тұру жолында ортақ мақсаттарды көздейді. Біз жаһандық қауіпсіздікті қамтамасыз етуге бағытталған бастамаларды үнемі қолдап келеміз. Алайда қол жеткізілген нәтижелермен шектеліп қалуға болмайды. Осыған байланысты, Түркі мемлекеттері ұйымы аясында киберқауіпсіздік жөніндегі арнайы кеңес құруды ұсынамын. Бұл құрылым мемлекеттеріміздің іс-қимылын үйлестіріп, күш-жігерді жұмылдыруға септігін тигізеді», – деді Тоқаев ТМҰ-ның Габалада өткен саммитінде.
Мемлекет басшысының айтуынша, бұл кеңес цифрлық қауіпсіздікті дамытуға және осы саладағы өзара байланысты нығайтуға ықпал ететін болады.
