Астана. 4 мамыр. ИНТЕРФАКС-ҚАЗАҚСТАН – Қазақстан үкіметі Риддер қаласының жылу желілері мен ЖЭО жабдықтарын жөндеуге резервтен шамамен 1,8 млрд теңге бағыттайды. Бұл туралы министрлер кабинетінің баспасөз қызметі хабарлады.
Тиісті қаулыға Премьер-министр Олжас Бектенов қол қойды.
«Қаражат қаланы жылумен қамтамасыз ету сенімділігін арттыруға және инфрақұрылымды 2026–2027 жылдардағы жылыту маусымына дайындауға бағытталады», – делінген хабарламада.
Қаржыландыру есебінен жылу желілерінің барынша тозған 12 учаскесін, сондай-ақ Риддер ЖЭО-дағы №5 және №6 қазандық агрегаттарын күрделі жөндеуден өткізу жоспарлануда.
Жұмыстарды жүргізу қажеттілігі техникалық тексеру нәтижелерімен расталғаны атап өтілді. Тексеру барысында бірінші кезекте жөндеуді қажет ететін учаскелер мен жабдықтар анықталған. Өткен жылыту маусымында кейбір учаскелерде зақымданулар мен тозу белгілері тіркелген болатын.
Үкімет бұл жобаны іске асыру жылу жүйесі жұмысының тұрақтылығын арттыруға және қала тұрғындарын жылумен сенімді қамтамасыз етуге мүмкіндік беретінін атап өтті.
