Астана. 4 мамыр. ИНТЕРФАКС-ҚАЗАҚСТАН – Президент Қасым-Жомарт Тоқаев үкіметке цифрлық экономика мен жасанды интеллектінің ел ЖІӨ-не әсерін бағалау бойынша ұсыныстар дайындауды тапсырды. Бұл туралы Мемлекет басшысының баспасөз қызметі Жасанды интеллектіні дамыту жөніндегі кеңестің екінші отырысының қорытындысы бойынша хабарлады.
«Үкімет Стратегиялық жоспарлау және реформалар агенттігімен бірлесіп, цифрлық экономиканың ЖІӨ-ге әсерін бағалау бойынша ұсыныстар енгізуі керек», – делінген хабарламадағы Тоқаевтың сөзінде.
Президент жаңа технологиялық тәртіпке көшу ағымдағы жағдайды объективті бағалауды талап етеді деп есептейді.
«Бізге ЖІӨ өсімінің 5 пайыздық нысаналы көрсеткішіне қол жеткізілгені туралы баяндағанда, оның қаншалықты деңгейде экономиканың нақты секторының жұмысымен, ал қаншалықты инновацияларды енгізу нәтижесінде қамтамасыз етілгенін нақты ажырата білуіміз қажет», – деп атап өтті Президент.
Ол цифрлық экономиканы және оның экономикалық өсімге қосатын үлесін бағалаудың нақты әдістемесінің болмауы шынайы көріністі бұрмалауы мүмкін екенін қадап айтты.
«Салмақты жетістіктердің болмауы жалпы көрсеткіштермен бүркемеленеді, бұл тиімділік иллюзиясын тудырады және цифрландыру мен жасанды интеллектінің экономикалық өсімге қосқан нақты үлесін объективті бағалауға мүмкіндік бермейді», – деді Тоқаев.
Мемлекет басшысы сондай-ақ әлемдік жетекші зерттеу орталықтарының мәліметтері бойынша, цифрлық трансформация жағдайында дамыған және дамушы экономикалар арасындағы алшақтық қарқынды түрде артып келе жатқанын мәлімдеді.
