Астана. 9 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «Нотариат қызметі және заң көмегі мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» заңға қол қойды.
Құжат бейсенбі күні ресми бұқаралық ақпарат құралдарында жарияланды.
Заңға енгізілген түзетулер нотариат саласындағы мемлекеттік бақылау жүйесін жетілдіруге бағытталған. Заңға берілген қорытындыда қолданыстағы бақылау тетігі Кәсіпкерлік кодекстің нормаларына негізделгенімен, нотариаттың жария-құқықтық мәртебесін толық ескермейтіні атап көрсетілген. Осыған байланысты мемлекеттік бақылауды жүргізу тәртібін тікелей «Нотариат туралы» заңда бекіту, тексерулердің негіздері мен рәсімдерін айқындау, сондай-ақ әділет органдарының өкілеттіктерін кеңейту көзделген.
Түзетулерге сәйкес, нотариустың лицензиясының қолданылуын алты айға дейін тоқтата тұрудың қосымша негіздері енгізіледі. Мұндай шаралар нотариус «Дербес деректер және оларды қорғау туралы» заңның талаптарын бұзған жағдайда қолданылуы мүмкін.
Сонымен қатар нотариат қызметімен айналысуға берілген лицензияның қолданылуы нотариус мемлекеттік қызметте болған кезеңде, сондай-ақ Парламент немесе мәслихат депутаты болып сайланған жағдайда тоқтатыла тұрады.
Бұдан бөлек, электрондық құжаттар мен электрондық цифрлық қолтаңбаға қатысты заңнама талаптарын бұзған нотариустарды лицензиядан айыру көзделген.
Заңда нотариаттың электрондық архивін қалыптастыру тәртібі де бекітілді. Сондай-ақ нотариат қызметімен айналысуға лицензиясы болғанымен, бес жыл және одан да ұзақ уақыт мамандығы бойынша жұмыс істемеген тұлғалар үшін біліктілікті міндетті түрде арттыру талабы енгізілді.
Республикалық нотариаттық палатаның, аумақтық нотариаттық палаталардың төрағаларының, сондай-ақ тәртіптік комиссиялардың төрағалары мен мүшелерінің өкілеттік мерзімі төрт жыл болып белгіленді. Олар бұл лауазымға бір рет қана қайта сайлана алады.
Азаматтардың құқықтарын қорғау және атқарушылық жазба жасау рәсімін жетілдіру мақсатында өндіріп алушының нотариусқа борышкердің міндеттемесін орындамағанын жазбаша түрде мойындағанын растайтын құжатты ұсынуы міндеттелді.
