Астана. 23 шілде. ИНТЕРФАКС-ҚАЗАҚСТАН — Қытайдың Guoyou Materials Group компаниясы Каспийдегі Құрық портында көпфункционалды терминалдың бірінші кезеңін салуға 470 млрд теңге инвестиция құюды жоспарлап отыр. Бұл туралы Қазақстан Премьер-министрінің баспасөз қызметі хабарлады.
Баспасөз қызметінің мәліметінше, Премьер-министр Олжас Бектеновтің Маңғыстау облысына жұмыс сапары барысында Үкімет басшысына Құрық портында көпфункционалды терминалдың алғашқы кезеңін салу жоспары таныстырылған.
Жоба Мемлекет басшысы Қасым-Жомарт Тоқаевтың биыл шілде айында Қытайға жасаған жұмыс сапары барысында қол жеткізілген келісімдер аясында жүзеге асырылады.
Guoyou Materials Group директорлар кеңесінің төрағасы Юй Боянның айтуынша, компания жобаға 470 млрд теңге инвестиция салады. Оның аясында автоматтандырылған контейнерлік терминал салынып, ұлттық теміржол желісіне қосылатын жаңа теміржол тармағы тартылады. Сондай-ақ контейнер тасымалдайтын кемелер мен паромдар жеткізіледі.
Терминалдың бірінші кезеңінің өткізу қабілеті жылына 15 млн тоннаға дейін жүк өңдеуге мүмкіндік береді. Құрылыс жұмыстары 2026–2028 жылдарға жоспарланған. Екінші кезең 2029–2031 жылдары жүзеге асырылып, нысанды 2032 жылы пайдалануға беру көзделіп отыр. Жоба толық аяқталғаннан кейін терминалдың қуаты жылына шамамен 25 млн тоннаға жетеді. Болашақта оны одан әрі кеңейту мүмкіндігі де қарастырылған.
Жоба аясында 800-ге дейін жұмыс орны ашылып, қазақстандық техникалық мамандар даярланады. Сонымен қатар операциялық қызметті кезең-кезеңімен жергіліктендіру жоспарланған.
Бұған дейін Қазақстанның Көлік министрлігі, Маңғыстау облысының әкімдігі және Kazakhstan Guoyou Investment компаниясы Құрық портының бірінші кезектегі көпфункционалды терминалын салу жөніндегі инвестициялық келісімге қол қойғаны хабарланған болатын.
Құрық порты Каспий теңізінің шығыс жағалауында, Ақтау портынан оңтүстікке қарай табиғи шығанақта орналасқан. Паром кешені астық, мұнай өнімдері, тыңайтқыштар, химиялық өнімдер және басқа да жүктерді тиеп-жөнелтуге маманданған. Теміржол-паром және автокөлік кешенінің өткізу қабілеті жылына 7 млн тоннадан асады.
23 шілдедегі ресми бағам бойынша, 1 АҚШ доллары – 467,65 теңге.
