Астана. 23 шілде. ИНТЕРФАКС-ҚАЗАҚСТАН — Қазақстан Премьер-министрі Олжас Бектенов Маңғыстау облысындағы Каспий теңізі жағалауында салынатын заманауи кеме жасау зауытының жобасымен танысты. Жобаны түркиялық YDA Group компаниясы жүзеге асырады. Бұл туралы бейсенбі күні Премьер-министрдің баспасөз қызметі хабарлады.
Жобаға тартылатын инвестиция көлемі кемінде 125 млрд теңгені құрайды.
YDA Group директорлар кеңесінің төрағасы Хусейн Арсланның айтуынша, кәсіпорын азаматтық және мамандандырылған кемелерді жобалау мен жасаудан бастап, оларды техникалық қызмет көрсету және күрделі жөндеуге дейінгі өндірістің толық циклін қамтамасыз етеді.
Сондай-ақ экипажсыз суүсті аппараттарын шығару жоспарланып отыр. Зауыттың өндірістік қуаты жылына сегіз жаңа кеме жасауға және 24 кемеге жөндеу жүргізуге мүмкіндік береді. Нысан пайдалануға берілгеннен кейін 1,5 мың тұрақты жұмыс орны ашылады.
Жоба аясында озық технологияларды трансферттеу, халықаралық стандарттарды енгізу және қазақстандық мамандарды даярлайтын оқу орталығын ашу көзделген. Сонымен қатар өндірістік кооперацияға отандық шағын және орта бизнес субъектілерін тарту жоспарланып отыр.
YDA Group құрылыс, денсаулық сақтау және аэроғарыш өнеркәсібі сияқты түрлі салаларда жобаларды жүзеге асырып келеді.
Құрық порты Каспий теңізінің шығыс жағалауында, Ақтау портынан оңтүстікке қарай табиғи шығанақта орналасқан. Паром кешені астық, мұнай өнімдері, тыңайтқыштар, химиялық өнімдер және өзге де жүктерді тасымалдауға маманданған. Теміржол-паром және автокөлік кешенінің өткізу қабілеті жылына 7 млн тоннадан асады.
23 шілдедегі ресми бағам бойынша, 1 АҚШ доллары – 467,65 теңге.
