Мәскеу. 22 желтоқсан. ИНТЕРФАКС – Қытайлық графикалық процессорлар әзірлеушісі Moore Threads Technology Бейжіңде өткен әзірлеушілерге арналған алғашқы конференциясы барысында Huashan атты жаңа жасанды интеллект чипін таныстырды. Бұл туралы Caixin Global хабарлады.
Жаңа чип жасанды интеллект модельдерін оқытуға және пайдалануға арналған. Компанияның мәлімдеуінше, негізгі өнімділік көрсеткіштері бойынша, соның ішінде қалқымалы үтірмен орындалатын операциялардың жылдамдығы мен жад өткізу қабілеті жағынан, Huashan америкалық Nvidia корпорациясының ең жаңа Blackwell процессорлары мен олардың алдыңғы буыны Hopper арасындағы деңгейде орналасады. Ал жад көлемі бойынша екі чиптен де асып түседі.
Moore Threads компаниясын кейде «қытайлық Nvidia» деп атайды. Ол 2020 жылы америкалық чип өндіруші компанияның бұрынғы топ-менеджерлерінің бірі тарапынан құрылған.
Желтоқсан айының басында Moore Threads Шанхай қор биржасында 8 млрд юань (шамамен 1,13 млрд АҚШ доллары) көлемінде IPO өткізді. Бұл биылғы жылы материктік Қытайдағы көлемі жағынан екінші ірі орналастыру болды. Дүйсенбі күнгі сауда қорытындысы бойынша компания акциялары 1,3%-ға өсті.
