МӘСКЕУ. 7 қыркүйек. ИНТЕРФАКС — Иран Сауд Арабиясы, Пәкістан және Түркия құрған қорғаныс одағына қосылса, Мәскеу мұны оң қадам деп бағалайды. Бұл туралы Ресей Сыртқы істер министрі Сергей Лавров мәлімдеді.
Лавров бұл пікірін Мәскеу мемлекеттік халықаралық қатынастар институтының студенттері мен оқытушыларымен кездесуде айтты.
«Әскери қақтығыстардың кезекті өршуін бастан өткерген елдер мұндай жағдайдың қаншалықты зардапты екенін түсіне бастады. Сондықтан қазір тұрақты ынтымақтастық тетігін қалыптастыруға мүмкіндік туып отыр. Соның бірі — Сауд Арабиясы, Пәкістан және Түркия арасындағы Мекке келісімі», — деді ол.
Ресей СІМ басшысының айтуынша, аталған елдер ұжымдық қауіпсіздік пен қорғаныс одағын құру идеясын ұсына отырып, оған басқа мемлекеттердің де қосылуына мүмкіндік бар екенін білдірген. Бұл тек Парсы шығанағы елдеріне қатысты емес. Ықтимал қатысушылар қатарында Мысыр да жиі аталады.
«Алжир де қызығушылық танытса, оның да оң әсері болары анық. Ал болашақта осы құрылым Иранның қандай шарттармен қатыса алатынын келіссе, бұл біз ұсынып жүрген Парсы шығанағындағы ұжымдық қауіпсіздік тұжырымдамасын жүзеге асыру жолындағы ең нақты қадам болар еді. Оның қалай аталатыны маңызды емес, біз бұл бастаманың авторы атануға таласпаймыз», — деді Лавров.
Ол өңір елдері арасында өзара қауіп төндірмей, ортақ қауіпсіздікті қамтамасыз ету қажеттігі туралы түсінік қалыптаса бастағанына назар аударды.
«Бір-біріне көрші елдер өзара қауіп төндірмеу керектігін біртіндеп түсініп келеді. Өкінішке қарай, АҚШ-та мұндай ұстанымды қолдауға бәрі бірдей дайын емес. Ал Израиль бұған ашық қарсы шығып, Иранды талқандағанға дейін жағдай оңалмайды деген пікір айтып отыр. Меніңше, уақыт өте келе көп нәрсе өз орнына келеді», — деді Ресей СІМ басшысы.
7 тамызда Сауд Арабиясы, Пәкістан және Түркия қорғаныс саласындағы ынтымақтастық туралы келісімге қол қойды. Құжатқа сәйкес, оған қатысушы елдердің біріне шабуыл жасалса, қалғандары бірлесіп әрекет етеді.
Пәкістан Сыртқы істер министрлігі бұған дейін ұжымдық қорғаныс жөніндегі бұл келісімге өзге мемлекеттердің де қосыла алатынын мәлімдеген.
