Мәскеу. 29 шілде. ИНТЕРФАКС – Ресей Сібірдегі Ангара–Енисей кластерінде сирек және сирек жер металдарын өндіру жобасы аясындағы ынтымақтастық мәселесі бойынша Қытаймен, Үндістанмен және Таяу Шығыс елдерімен келіссөздер жүргізіп жатыр. Бұл туралы РФ Қауіпсіздік кеңесі хатшысының орынбасары Александр Масленников мәлімдеді.
«Жобалық кеңсе Үлкен Оңтүстік елдеріндегі серіктестермен – Қытаймен, Үндістанмен және Таяу Шығыс мемлекеттерімен келіссөз жүргізуде. Диалог мемлекеттік деңгейде де, компаниялар арасында да жалғасып жатыр. Бұл жобаға қызығушылық бар», – деді Масленников «Ведомости» газетіне берген сұхбатында.
Оның айтуынша, басты мақсат – Ресейдің жобаларды үйлестіріп, олардың төңірегіне серіктестерді біріктіре алатын модельді қалыптастыру.
«Әрине, белгілі бір шектеулер бар. Олар – технологияларға қолжетімділік, төлем жүргізудегі қиындықтар, сондай-ақ АҚШ пен Еуропалық одақтың екінші деңгейлі санкцияларына ұшырау қаупі», – деді ол.
Соған қарамастан, Масленниковтың айтуынша, серіктестер бірлескен жұмысқа дайын.
«Критикалық маңызы бар металдар энергетикамен бірге жаңа технологиялық нарықтардың басым бөлігінің негізін құрайды. Сондықтан оларға деген қызығушылық стратегиялық сипатқа ие», – деді РФ Қауіпсіздік кеңесі хатшысының орынбасары.
Еске салсақ, 2025 жылғы 7 қарашада Ресей Қауіпсіздік кеңесінің хатшысы Сергей Шойгу Ангара–Енисей макроөңірінде құрылатын сирек және сирек жер металдарын өңдеу кластерінің негізгі өндірістік алаңдары айқындалғанын мәлімдеген болатын. Оның жалпы аумағы 3 мың гектардан асады.
